ÁCh-2018: Belgııa quramasy qarqynyna qarqyn qosty

Á degennen Belgııa qarsylas qaqpasyna lap qoıdy. Shabýyl shebin nyǵaıtty. Erterek gol soǵýǵa yqylas tanytty. Degenine jetti. Týnıs qorǵaýshylary sondaı sátterdiń birinde belgııalyqtardy shalyp jyǵýdan basqa amaly qalmady. Bul oıynnyń nebári 1-mınýty bolatyn. Kevın de Brıýıne ony qaqpaǵa durys baǵyttaı almady. Gol 6-mınýtta penaltıden soǵyldy. Ony Belgııa jampozy Eden Azar óziniń enshisine jazdy. Budan keıin de belgııalyqtar ekpinin basa qoıǵan joq. Olar 16-mınýtta esepti ústemeledi. Bul goldy Drıs Mertenstiń pasynan keıin Romelo Lýkaký qaqpaǵa engizdi. Týnıs jigitteri qos goldan keıin eńsesin túsire qoıǵan joq. Eki mınýttan keıin Vahbı Hazrıdiń áýelete bergen dobyn Dılan Bronn baspen Belgııa qaqpasyna top etkizdi. Esep 2:1. Belgııa alda bolǵanymen bul gol olar úshin jeńiske jetý úshin áli de tynbaı ter tógý qajettigin ańǵartyp qoıdy.

Biz budan buryn «Belgııa quramasyna Týnıs qolaısyz qarsylas pa?»  degen oıymyzdy jetkizgen edik. Óıtkeni, qos qurama búginge deıin 3 márte kezdesip, birýi bir márte ekinshisi eki márte jeńiske jetkenin aıttyq. Eki qurama bir-biriniń qaqpasyna úsh-úshten gol da soqqan. Sondyqtan bul oıynda kim jeńedi degen saýaldyń jaýaby basy ashyq kúıinde qalyp qoıǵan edi. Belgııa jigitteri laıyqty jaýabyn berdi. 

Týnıs jigitteri buǵan deıin tórt márte álem birinshiliginiń fınaldyq kezeńine kelgen. Onyń eshbirinde toptyq kezeńnen shyǵa almaǵan eken. Sol olqylyqtyń ornyn bıyl toltyra ma degen oı jankúıerler kókeıinde tur.

Týnıs te bul oıynda jeńilgen jaǵdaıda eline erterek qaıtýǵa qamdanady. Qurama oıynshylary ony jaqsy túsinedi. Sol sebepti olar árbir sátti durys paıdalanyp qalýǵa tyrysty. Alǵashqy 30 mınýtta kóptegen qaýipti shabýyl uıymdastyrdy. Olar qarsylastyń yǵyna jyǵyla qoıǵan joq. Belgııalyqtardy op-ońaı aldap, olardyń qaqpasy aldyna emin-erkin jetip jatty. Birinshi kezeń osylaısha órbidi. Eki qurama ashyq shabýylǵa shyqty.  Belgııalyqtar da qur qarap qalǵan joq. Shabýylǵa shyǵýdy esten shyǵarǵan joq. Degenmen gol soǵatyn birneshe múmkindikti Romelo Lýkaký qur jiberip aldy. Ol degenine 45-mınýtta jetti. Áriptesi Toma Meneniń pasyn Lýkaký golǵa aınaldyrdy.   

Qorǵaýshy Tobı Alderveıreldtiń pasyn 51-mınýtta Eden Azar golǵa aınaldyrdy. Esep 4:1. Týnıs endi jeńistiń qoldan uzap ketkenin túsindi. Shabýylǵa shyǵýdan góri qaqpasyna gol jiberip almaýdyń jolyn izdegendeı kúı keshti. Oıynnyń 90-mınýtynda Mıshı Batshýaıı óz komandasy taǵy bir dop syılady. Esep 5:1. Týnıs budan keıin esep aıyrmasyn qysqartýǵa kúsh saldy. 93-mınýtta Vahbı Hazrı gol soǵyp, kezdesýdiń qorytyndy esebin belgiledi. Nátıjesinde oıyn 5:2 esebimen Belgııanyń paıdasyna aıaqtaldy.

Belgııa quramasy eki oıynda 7 gol soǵyp, ózderiniń babynda ekenin taǵy bár márte dáleldeı tústi. Bul oıynda Romelo Lýkaký eki gol soǵyp, surmergender kóshinde portýgaldyq Krıshtıaný Ronaldýmen teńesti. Ol óz quramasynyń Panamamen kezdesýinde de qos goldyń avtory atanǵan edi.

Bul toptaǵy kelesi týr oıyndary 28 mýsym kúni bolady. Sol kúni Anglııa men Belgııa, Týnıs pen Panama quramalary kezdesedi.

Sondaı-aq, búgin F tobyndaǵy Meksıka men Ońtústik Koreıa  («Qazaqstan». 21.00), Germanııa men Shvetsııa («Qazaqstan». 00.00) oıyndary bolady.