ÁCh-2018: Belgııa Brazılııany utyp, jartylaı fınalǵa shyqty
QOSTANAI. QazAqparat - Reseıde ótip jatqan fýtboldan álem chempıonatynyń shırek fınalynda Brazılııa quramasy Belgııamen kezdesti, dep habarlaıdy QazAqparat tilshisi.
Match Qazan qalasynda ótti. Brazılııanyń bas bapkeri Tıte alańǵa myna oıynshylardy shyǵardy: Alıson, Fagner, Tıago Sılva, Mıranda, Marselo, Fernandıno, Paýlıno, Felıpe Koýtıno, Vıllıan, Neımar, Gabrıel Jezýs.
«Pentakampeondarǵa» qarsy Roberto Martınes myna shákirtterine senim artty: Kýrtýa, Alderveıreld, Kompanı, Vertongen, Vıtsel, Fellaını, Mene, Shadlı, De Brıýıne, Lýkaký, Azar.
Tóreshi Mılorad Majıchtiń ysqyryǵy estilisimen belgııalyqtar jyldam shabýylǵa kóshti. Jartylaı qorǵaýshylar Kevın De Brıýıne men Naser Shadlı qaqpaǵa jaqyn tustan soqqy baǵyttady. Degenmen, olarǵa dáldik jetispedi. Sálden soń Brazılııa qorǵaýshysy Tıago Sılva jaýap qaıtardy. Ol buryshtamadan kóterilgen dopqa birinshi jetip, baspen urǵan. Alaıda, onyń soqqysy qaqpa baǵanasyna tıip, keri qaıtty.
13-mınýtta eýropalyqtar tablodaǵy kórsetkishke ózgeris engizdi. Naser Shadlıdiń buryshtamadan asyrǵan pasy brazılııalyq oıynshy Fernandınoǵa tıip, qaqpadan bir-aq shyqty. 0:1!
Oıda joqta gol kirgizip alǵan Brazılııa fýtbolshylary ashyq shabýylǵa kóshkendeı. Aldymen Koýtıno, keıin Marselo Belgııa qaqpasyn nysanaǵa aldy. Alaıda, tájirıbeli qaqpashy Tıbo Kýrtýa ońaılyqpen aldyrmady. Qaqpasyna baǵyttalǵan soqqylarǵa toıtarys berip otyrdy.
31-mınýtta Belgııa úzdigi Romelý Lýkaký nátıjeli shabýylǵa muryndyq boldy. Ol alań ortasynan bastap qorǵaýshylardy aldap kelip, áriptesi De Brıýınege pas usyndy. Sońǵysy múmkindikti múlt jibermeı, ekinshi goldy soqty.
Ekinshi taımda alańǵa «Lıverpýl» shabýylshysy R.Fırmıno shyqty. Ol Vıllıandy almastyrdy. Taǵy bir shabýylshynyń shyǵýymen ońtústik amerıkalyqtardyń oıyny órbip sala berdi. 55-mınýtta Belgııa qorǵaýshysy Vensan Kompanı Gabrıel Jezýsty shalyp jyqqan. Bastapqyda tóreshi Mılorad Majıch penaltı belgiledi. Degenmen, VAR (beıneqaıtalaý) júıesiniń kómegimen sheshimin ózgertti.
Kezekti bir shabýylda alańǵa tyńnan shyqqan Renato Aýgýsto esep aıyrmasyn qysqartty. Ol Felıpe Koýtınonyń joǵarylata bergen pasyn keregine jaratty. Kelesi sátte sol R.Aýgýsto esepti teńestirýge shaq qaldy. Aıyp alańyna kire sala baǵyttaǵan doby qaqpadan sál ǵana qıys ketti.
Toqsan mınýt túgesildi. Tóreshi qosqan bes mınýtta Neımar bastaǵan jigitter qansha tyrysqandarymen belgııalyqtardyń qorǵanysyn buza almady.
Osylaısha, Belgııa quramasy álem chempıonatyndaǵy joryǵyn ary qaraı jalǵastyrady.
