ÁCh-2018: Avstralııa quramasy Danııaǵa qandaı qaýqar kórsetedi

Aıta keterligi, bul - qos quramanyń tórtinshi márte kezdesýi. Eki oıynda dat fýtbolshylary jeńiske jetken edi. Alǵashqy kezdesý 2007 jyldyń 6 aqpanynda Anglııa astanasy - London qalasynda ótip, onda dat jigitteri 3:1 esebimen basym tústi. Kelesi kezdesý de joldastyq deńgeıde ótkizildi. Ońtústik Afrıkanyń  Iohannesbýrg qalasynda 2010 jyldyń 1 maýsymynda bolǵan oıynda jasyl qurlyqtyń ókilderi 1:0 esebimen jeńdi. Úshinshi oıyn da joldastyq kezdesý bolyp esepteledi. 2012 jyldyń 6 aqpanynda Danııanyń Kopengagen qalasynda ótkizilgen matchta taǵy da alań ıeleri 2:0 esebimen jeńiske jetti. Budan buryn resmı oıyndarda sheberlik baıqasyp kórmegen qos qurama bir-birine ese jiberýdi qolaıly kórmeıtini anyq.

Aldaǵy kezdesý jaıynda Avstralııa quramasynyń qorǵaýshysy Azız Behıch Danııany jeńýge kúsh salatynyn jetkizdi. «Biz alǵashqy oıynda ózimizge qolaıly nátıjege qol jetkize alǵan joqpyz. Sondyqtan aldaǵy kezdesýge tyńǵylyqty ázirlik jasadyq. Biz ózimizdiń jaqsy qyrymyzdy kórsetemiz», - dedi ol. Danııa quramynda jaraqat alǵan fýtbolshy bar. Jartylaı qorǵaýshy Vılıam Kvıst bıylǵy álem birinshiliginde endi oınaı almaıtyn boldy. Perýmen ótken oıynda alǵan jaraqatyna baılanysty ony áriptesi Lasse Shone 35-mınýtta almystyrǵan edi.

Danııa alǵashqy týrda Perý quramasynan aılasyn asyrdy.  Qarsylasyn 1:0 esebimen jeńdi.  Avstralııany da tize búktirse, jarystyń kelesi kezeńine beriletin joldamany erterek qaltaǵa basady. Esesine Avstralııa Frantsııadan 1:2 esebimen jeńilip, jaǵdaıyn birshama qıyndatyp alǵan edi. Sondyqtan jasyl qurlyq ókilderi bar kúshin salary anyq. Danııanyń bas bapkeri Oge Hareıde qaqpashy Kasper Shmeıhelge kóńili tolatynyn jetkizdi. «Kasper Shmeıheldi akrobat dep sanaýǵa negiz bar. Ony álemdegi úzdik qaqpashynyń biri dep sanaı alamyz», - dedi ol.

Avstralııa álem birinshiligine áreń jetkeni belgili. Toptyq kezeńde V tobynda úshinshi oryn alǵan ol pleı-off kezeńinde Gondýrasty áreń jeńdi. Fınaldyq kezeńde aldymen Frantsııadan 1:2 esebimen jeńilgen qurama endi Danııaǵa qandaı qaýqar kórsete alady? Ony búgingi kezdesýde anyqtaıtyn bolamyz. Oıyn «Qazsport» arnasynan 18.00-de tikeleı kórsetiledi.

Avstralııa búgingi kúnge deıin mýndıaldiń fınaldyq kezeńine 4 márte qatysqan. 2006 jyly toptyq kezeńde Japonııany 3:1 esebimen tize búktirip, Brazılııadan 0:2 esebimen jeńilip, Horvatııamen 2:2 esebimen teń oınady. Jarystyń 1/8 satysynda Italııadan 0:1 esebimen jeńilip, eline qaıtýǵa májbúr boldy. Olardyń budan ózge joǵary kórsetkishi ázirge tirkelgen joq. 1974, 2010, 2014 jyldarda toptyq kezeńnen asa alǵan joq.

Sondaı-aq, búgin bul topta Frantsııa - Perý («Qazaqstan». 21.00) quramalary kezdesedi. Al D tobynda Argentına men Horvatııa («Qazaqstan». 00.00)  sheberlik baıqasady.