ÁCh-2018: Astana ýaqytymen shırek fınal oıyndarynyń kestesi jarııalandy
ASTANA. QazAqparat - Fýtboldan Reseı jasyl alańdarynda ótip jatqan 2018 jylǵy Álem chempıonatynyń shırek fınal oıyndary 6-7 shilde kúnderi ótedi. Eń aldymen Ýrýgvaı jáne Frantsııa quramalary jartylaı fınal joldamasyn sarapqa salady, dep habarlaıdy QazAqparat tilshisi.
Oıyn «Nıjnıı Novgorod» stadıonynda ótedi. Qazaqstandyq jankúıerler kezdesýdiń tikeleı translıatsııasyn Qazsport telearnasynan Astana ýaqytymen (kelesi oıyndar da - Astana ýaqytymen) 20:00-den bastap tamashalaı alady.
6 shildedegi ekinshi oıynda Ýrýgvaı-Frantsııa matchynyń jeńimpazyna jartylaı fınalda qarsylas atanatyn komanda belgili bolady. «Qazan Arena» stadıonynda ótetin Brazılııa-Belgııa oıyny shırek fınaldyń eń tartysty kezdesýleriniń biri bolmaq. Ony Qazaqstannyń eki birdeı telearnasy - Qazsport jáne Qazaqstan 00:00-den bastap tikeleı efırden kórsetedi.
Erteńine, 7 shilde kúni jartylaı fınaldyń ekinshi juby anyqtalady. 20:00-de Sochıdegi «Fısht» stadıonynda Reseı men Horvatııa ózara kúsh synasady. Oıyndy Qazsport jáne Qazaqstan telearnalarynan kórýge bolady.
Olardyń qarsylasy túngi 00:00-de «Samara Arena» stadıonynda bolatyn Shvetsııa-Anglııa kezdesýinde belgili bolady. Bul oıyndy da Qazsport jáne Qazaqstan telearnalary tikeleı efırden kórsetedi.
