ÁCh-2018: Argentınanyń Islandııamen oınaıtyn quramy belgili boldy
ASTANA. QazAqparat - Búgin fýtboldan 2018 jylǵy Álem chempıonatynyń C jáne D tobyndaǵy komandalar birinshi týr kezdesýlerin ótkizedi, dep habarlaıdy QazAqparat tilshisi.
Jankúıerler asyǵa kútken oıyndardyń biri áıgili Lıonel Messı bastaǵan Argentına jáne alǵash ret mýndıalǵa qatysqaly otyrǵan Islandııa quramalary arasynda bolmaq. Bul eki komandanyń bir-birinen aıyrmashylyǵy orasan ekenin aıtyp otyrýdyń ózi artyq. Biraq araldyqtardyń bas bapkeri Heımır Hallgrımsson óz komandasynyń FIFA reıtıngindegi úzdik 20 quramanyń biri ekenin aıtyp, Islandııa álem chempıonatyna kezdeısoq joldama aldy degendermen kelispeı otyr.
«Eýropa chempıonatynda keremet nátıjege jettik. Sońǵy tórt jylda komanda turaqty oıyn órnegin kórsetip keledi, mańyzdy oıyndardy uttyq. Biz chempıonattyń basqa qatysýshylaryna qaraǵanda ózgesheleý oınaımyz», - deıdi bapker.
Islandııa - osydan eki jyl buryn ótken Eýropa chempıonatynyń pleı-off kezeńinde Anglııany shyǵaryp jibergen komanda. Bapkeri H. Hallgrımssonnyń negizgi mamandyǵy - tis dárigeri. Osy chempıonatta komandasy qandaı nátıje kórsetýinen tys, tis emdeýin toqtatpaıtynyn málimdep úlgerdi.
Ol Reseıdegi Álem birinshiligine shaqyrǵan 22 fýtbolshynyń tek bireýi - qorǵaýshy Bırkır Sevarsson ǵana ishki chempıonatta, Reıkıavıktiń «Valıýr» komandasynda óner kórsetedi. Qaqpashylardyń úsheýi de (Hannes Toýr Halldoýrsson, Frederık Shram, Rýnar Rýnarsson) Danııa klýbtarynda, qorǵaýshy Herdýr Magnýsson, jartylaı qorǵaýshylar - Iohann Berg Gýdmýndsson, Bırkır Bıarnason, Gılfı Sıgýrdsson jáne shabýylshy Ion Bedvarsson - Anglııa chempıonattarynda oınaıdy. «Rostovtaǵy» Sverrır Ignason, Ragnar Sıgýrdsson jáne Bern Sıgýrdarson Reseıdiń aýasymen etene tanys deýge bolady. Komanda kapıtany Aron Gýnnarsson Ýelstiń «Kardıf sıtı» komandasynan shaqyrylǵan. Basqa fýtbolshylar da Eýropanyń túrli chempıonattarynda júr. Jalpy, sarapshylar Islandııa osy chempıonatta uıalmaıtyndaı oıyn kórsetedi dep senip otyr. Debıýt oıynnyń alǵashqy mınýttarynan alańǵa kim shyǵatynyn bapker jarııa etken joq.
Al Argentına bıyl 17-shi ret mýndıalǵa qatyspaq. «Albıseleste» degen atpen tanylǵan quramanyń oıynshylary tipti fýtbolǵa qyzyqpaıtyn adamdarǵa da belgili. Keshegi baspasóz máslıhatynan keıin Argentına bas bapkeri Horhe Sampaolı negizgi quramda: Vıllı Kabalero, Nıkolas Otamendı, Markos Roho, Nıkolas Talıafıko, Haver Maskerano, Edýardo Salvıo, Lýkas Bılıa, Maksımılıano Mesa, Anhel Dı Marııa, Lıonel Messı jáne Serhıo Agýero shyǵatynyn jetkizdi.
Bir qyzyǵy, komanda kapıtany Lıonel Messı álem chempıonattaryndaǵy debıýtin osydan týra 12 jyl buryn, 2006 jylǵy 16 maýsymda Serbııa jáne Chernogorııaǵa qarsy ótken oıynda toılap, komandasynyń sońǵy golyn soqqan bolatyn (6:0). Al bıylǵy 16 maýsymda álem chempıonatynyń debıýtanty atanyp otyrǵan komandaǵa gol soǵa ala ma, joq pa - birneshe saǵattardan soń bilemiz.
Eske sala keteıik, oıyndy Qazaqstan ulttyq arnasy Astana ýaqytymen 19:00-de tikeleı efırden kórsetedi.
Týrnır oıyndarynyń tolyq kestesin myna jerden kórýge bolady.
