ÁCh-2018: Anglııa quramasy Panamany jeńe ala ma
ASTANA. QazAqparat - Búgin, 24 maýsymda fýtboldan álem birinshiligi toptyq kezeńindegi G tobyndaǵy ekinshi oıyn ótedi. Bul kezdesýde Anglııa men Panama quramalary ózara sheberlik baıqasady, dep habarlaıdy QazAqparat tilshisi.
Anglııa úshin Panama qıyn qarsylas bola qoımas. Eki qurama eshqashan bir-birimen kezdesip kórgen emes. Panama álemdik dodaǵa alǵash ret qatysyp otyr. Áleýeti qandaı ekenin olardyń Belgııamen kezdesýinde baǵamdaǵan sekildimiz. Muhıttyń arǵy betinen kelgen fýtbolshylar óz qaqpasy mańynan alysqa uzaı alǵan joq. Óz qaqpasynan jaýapsyz úsh dop alyp shyqty. Al Anglııa Týnısti áreń tize búktirdi. Esep 2:1. Sondyqtan Panamamen oıynda olar jankúıerler aldynda ózderin jaqsy qyrynan tanytýy tıis.
Anglııa irikteý kezeńinde táp-táýir nátıjege qol jetkizdi. Aǵylshyndar 10 oıynnyń 8-de jeńiske jetip, 2-de teń oınady. Degenmen gol soǵý jóninen maqtana almaıdy. Barlyq kezdesýinde bar-joǵy 18 gol soqty. Topta Slovakııa, Slovenııa, Shotlandııa sekildi quramalar synǵa túskenin eskersek, oǵan túsinistikpen qaraýǵa ábden bolar.
Degenmen bul shabýyl shebin nyǵaıta túsýdiń qajettigin ańǵartady. Al Panama irikteý kezeńinde AQSh pen Gondýras sekildi quramalardy artqa saldy. AQSh pen Gondýras irikteý kezeńin óte sátsiz ótkizdi. Panama Gondýras sekildi 13 upaı jınaǵan edi. Dop aıyrmasy táýir bolǵan panamalyqtar Reseıge berilgen joldamany qaltaǵa basty.
Aǵylshyndar aqtyq saıysta oıyn kórsete me? Tumandy Albıon eliniń jankúıerleri solaı dep senim artyp otyr. Anglııa fýtbolynyń jaryq juldyzy Devıd Bekhem de dál osy pikirdi kóldeneń tartady.
«Meniń oıymsha, Argentına men Anglııa fınalda kezdesedi. Árıne, men óz quramama jankúıer bolamyn», - deıdi ol.
Alaıda Argentınanyń jaǵdaıy qazir qyl ústinde tur. Messı jáne onyń serikteri sońǵy týrda Nıgerııadan basym túspese, eline erterek qaıtýy da múmkin. Sondyqtan Bekhemniń boljamy rasqa shyǵa ma? Ázirge belgisiz. Quramanyń bas bapkeri Garet Saýtgeıt óz shákirtterine zor senim artatynyn aıtady. Aldaǵy oıyn jaıynda pikirin bildirgen bapker «Árıne, álem halqy Anglııa birinshiligin úzbeı kóredi. Bizdiń jigitterdiń artyq jáne kem tustaryn jaqsy biledi. Biz Panama quramasyn jan-jaqty zerttedik. Olar - óte qaısar qurama. Іrikteý kezeńinde AQSh pen Gondýrasty artqa qaldyrdy. Biz bul qarsylasymyzǵa zor qurmet kórsetemiz»,- dedi.
Atalmysh oıyn «Qazsport» arnasynan 18.00-de tikeleı efırde kórsetiledi. Sondaı-aq, búgin N tobyndaǵy Japonııa men Senegal («Qazaqstan». 21.00), Polsha men Kolýmbııa («Qazaqstan». 00.00) quramalary kezdesedi. Osymen álem birinshiliginiń ekinshi týr oıyndary túıindeledi.
