ÁCh-2014: Sýares Anglııa quramasynyń «tas-talqanyn» shyǵardy
ASTANA. QazAqparat - Búgin Brazılııada ótip jatqan álem chempıonatynda Anglııa quramasy Ýrýgvaıǵa jol berdi.Bul matchtyń qaharmany, sóz joq, Lýıs Sýares boldy. Anglııa premer-lıgasynyń eń úzdik shabýylshysy L.Sýares aǵylshyndarǵa eki gol salyp, óz komandasyna mańyzdy úsh upaı alyp berdi.
Birinshi goldy Sýares alǵashqy taımnyń 39-mınýtynda, qarymta shabýyldardyń birinde salyp ketti. Ekinshi taımda oıynnyń 75-mınýtynda Ýeın Rýnı esepti teńestirip, úmit otyn jaqqan bolatyn. Alaıda sol baıaǵy Sýares 85-mınýtta esepti 2:1-ge jetkizdi. Oıyn sońyna deıin qyzý tartys bolǵanymen, nátıje bolǵan joq. Aıta keteıik, Anglııa osymen ekinshi oıynyn jeńilip otyr. Ýrýgvaı bunyń aldynda Kosta-Rıkadan utylǵan bolatyn.
