ÁCh-2014: Reseı jeńilisten aman qaldy - VIDEO
ASTANA. QazAqparat - Búgin Brazılııada fýtboldan álem chempıonatynyń toptyq kezeńinde Reseı men Ońtústik Koreıa quramalary kezdesip, mýndıaldaǵy alǵashqy oıyndaryn ótkizdi.
Bul match 1:1 esebimen teń aıaqtaldy.
Birinshi taımda komandalar gol soǵa almady. Ekinshi taımda, oıynnyń 68-mınýtynda kárister Gyn Ho Lıdiń goly arqyly alǵa shyqty. Kezdesý favorıti retinde alańǵa shyqqan reseılikterge endi úlken kúshpen alǵa lap qoıý kerek boldy. Komandanyń bas bapkeri Fabıo Kapello Jırkovtyń ornyna Kerjakovty alańǵa shyǵardy jáne ol úmitti aqtady. Matchtyń 73-mınýtynda Kerjakov koreıalyqtardyń qaqpasyna dop saldy.
Bul topta úsh upaı alǵan Belgııa quramasy bastap tur. Ekinshi oryndarda bir upaımen Reseı men Ońtústik Koreıa jaıǵasqan. Belgııadan jeńilis tapqan Aljır sońǵy tórtinshi orynda qaldy.
