ÁCh-2014: Mýndıaldiń alǵashqy matchynda Neımar Brazılııa quramasyna jeńis ákeldi - VIDEO
SAN-PAÝLÝ-ASTANA. QazAqparat - Fýtboldan Álem chempıonatynyń alǵashqy matchynda Brazılııa qurama komandasy Horvatııany 3:1 esebimen tize búktirdi.
Alǵashqy goldy 11-mınýtta Brazılııa quramasynyń oıynshysy Marsello óz qaqpasyna darytyp alǵan bolatyn. Bul olqylyqtan keıin alań qojaıyndary horvatııalyqtardyń qaqpasyna lap qoıdy. Brazılııa quramasynyń shabýylshysy Neımar 27-mınýtta Pletıkosa qorǵaǵan qaqpaǵa dop darytty. Birinshi taımda oıynshylar 1:1 esebimen demalýǵa attandy.
Ekinshi kezeńde oıynnyń 71-mınýtynda Neımar penaltıden gol salyp, alań ıelerin alǵa shyǵardy. Al oıynnyń aıaqtalýyna sál qalǵanda brazılııalyq ujymnyń taǵy bir oıynshysy Oskar horvatııalyqtardyń qaqpasyna úshinshi goldy toǵytyp ketti, qorytyndy esep - 3:1.
Aıta keteıik, match San-Paýlý qalasynda "Arena Korıntıans" stadıonynda ótti. Erteń chempıonattyń úsh matchy bolady. Kamerýn Meksıkamen, Ispanııa Nıderlandymen, Chılı Aýstralııamen kezdesedi.
