ÁCh-2014: Meksıka Horvatııany tize búktirdi
ASTANA. QazAqparat - Búgin fýtboldan álem chempıonatynyń úshinshi týrynda Meksıka Horvatııa quramasyn 3:1 esebimen oısyrata jeńdi.
Birinshi taımda qos qurama da óte saq oınady. Esesine ekinshi taımda meksıkalyqtar ústi-ústine shabýyldady. Matchtyń 72-mınýtynda Rafael Markes esep ashyp, meksıkalyq jankúıerlerdi qýanyshqa bóledi. Shabyttanǵan "atstekter" 75-mınýtta ekinshi goldy saldy, onyń avtory - Andres Gýardado. Al 82-mınýtta Haver Ernandes esepti 3:0-ge jetkizdi. Tórtinshi goldy soǵýǵa asyqqan Meksıka quramasy 87-mınýtta óz qaqpalaryna gol ótkizip aldy. Perıshıch gol jibermeı kele jatqan meksıkalyq qaqpashy Ochoanyń kórsetkishine toqtam saldy. Horvattardy tize búktirgen Meksıka quramasy 7 upaımen fınaldyq básekelerge joldama aldy. Aıta keteıik, brazılııalyqtar A tobynda 7 upaı enshilep, birinshi orynmen pleı-offqa shyqty. Upaıdan kemshin túsken Horvatııa men Kamerýn úılerine qaıtatyn boldy.
