ÁCh-2014: Klozeniń tarıhı goly Germanııany jeńilisten aman saqtady - VIDEO
ASTANA. QazAqparat - Brazılııada fýtboldan álem chempıonatynda Germanııa quramasy sensatsııalyq jaǵdaıda Gana fýtbolshylarynan jeńilis taba jazdady.
Oıyn 2:2 esebimen aıaqtaldy. Bunyń ózi kútpegen nátıje ekendigin aıta keteıik. Nemis mashınasy bul kezdesýdiń aıqyn favorıti bolatyn.
Alaıda birinshi taımda germanııalyqtardyń oıynynda eshqandaı júıelilik baıqalmady. Ol kezeńde esep ashylmady. Ekinshi taımda oıynnyń 51-mınýtynda Gettse gol salyp, nemis komandasy alǵa shyqty. Degenmen ganalyqtar 53-mınýtynda Aııýdyń arqasynda esepti teńestire aldy. Al 64-mınýtta Djıan afrıkalyqtardy tipti alǵa shyǵardy.
Qatty sasqan Germanııa quramasynyń bas bapkeri Ioahım Lev alańǵa ardager oıynshylar - Mıroslav Kloze men Bastıan Shvaınshtaıgerdi shyǵardy jáne qatelesken joq. Alańǵa endi shyqqan Mıroslav Kloze buryshtama doby kezinde qarsylastar qaqpasyna dopty toǵytyp ketti. Bul goly arqyly Kloze óziniń mansabynda mýndıaldarda soqqan jalpy goldar sanyn 15-ke jetkizdi jáne rekord ıesi brazılııalyq Ronaldoǵa jetip aldy.
Al oıyndaǵy qorytyndy esep - 2:2.
