ÁCh-2014: Germanııa Brazılııany 7:1 esebimen oısyrata jeńip, fınalǵa shyqty
ASTANA. QazAqparat - Búgin Brazılııada ótip jatqan fýtboldan álem chempıonatynyń jartylaı fınaldyq básekesinde Brazılııa Germanııa quramasynan 1:7 esebimen jeńilis tapty.
Belý-Orızontı qalasyndaǵy "Mıneraý" stadıonynda ótken matchtyń nebári 30 mınýty ishinde germanııalyqtar 5 gol toǵytyp, alań ıelerin meńireý keıipke túsirdi. Gol avtorlary: Tomas Mıýller (11-shi mınýt), Mıroslav Kloze (23-shi mınýt), Tonı Kroos (24 jáne 26-shy mınýttarda), Samı Hedıra (29-shy mınýt).
Ekinshi taımda Klozeni almastyrǵan Andre Shıýrrle dýbl avtory atanyp, esepti 7:0-ge jetkizdi. Oıynnyń sońǵy mınýtynda brazılııalyq oıynshy Oskar óz komandasynyń "jetim" golyn salyp, esepti az da bolsa qysqarta aldy.
Aıta keteıik, bul kezdesýge brazılııalyqtardyń kóshbasshysy Tıagý Sılva men komandanyń úzdik shabýylshysy Neımar alańǵa shyǵa almaǵan bolatyn.
Al Mıroslav Kloze álem chempıonattarynda 16-shy golyn salyp, álemdik rekordqa qol jetkizdi. Bunyń aldynda ol brazılııalyq shabýylshy Ronaldomen birge osy rekordty bólisip kelgen bolatyn.
