ÁCh-2014: Brazılııa tarıhyndaǵy eń iri jeńilisten soń el zańdaryna ózgerister engizilmek
ASTANA. QazAqparat - Fýtboldan mundaı iri jeńilisti endi boldyrmaý úshin memleket osy sport túriniń damýyna kóbirek qoldaý kórsetýi tıis, dep málim etti Rıo-de-Janeıroda Brazılııanyń sport mınıstri Aldo Rebelo.
Aıta keteıik, seısenbi kúni Brazılııa quramasy Germanııa komandasynan 1:7 esebimen jeńilip qalǵan edi. Qazir atalmysh el bul jeńilistiń sebep-saldaryn jan-jaqty izdestirýge belsene kirisip te ketti. Olardyń qatarynda jergilikti fýtbol klýbtarynyń sheshilmeı jatqan kóptegen máseleleriniń bolýy men sapaly ınfraqurylymnyń joqtyǵy atalýda. «Germanııa quramasynan jeńilip qalýymyz fýtbol salasyna ózgerister engizý qajettigimizdi kórsetip otyr. Bizge jańa stadıondar men jattyǵý ortalyqtaryn salý kerek», - dedi mınıstr. Halyqaralyq Fýtbol qaýymdastyǵy federatsııasynyń (FIFA) erejesi boıynsha memleket ulttyq federatsııalardyń isine aralasa almaıdy. Rebelo bul týraly biletinin, alaıda sporttyń damýy memlekettik mańyzǵa ıe bolǵandyqtan, memlekettiń bul salada ne bolyp jatqanyn bilýge quqyly ekenin atap aıtty. Brazılııanyń kóptegen fýtbol klýbtarynyń mıllıondaǵan qaryzdary bar, demek, memlekettiń birinshi mindeti - qaryzdardy joıyp, olardy qarjylandyrý júıesin ózgertý kerek dep sanaıdy Rebelo.
«Muny tek zańǵa ózgerister engizý arqyly ǵana júzege asyrýǵa bolady. Men Ulttyq kongreske klýbtardy jazalaý da, yntalandyrý da sharalary qarastyrylatyn birqatar zańdardy qabyldaý týraly usynysymdy jetkizbekpin», - dedi mınıstr.
Aıta keteıik, Brazılııa quramasy aldaǵy senbi kúni Brazılıa qalasynda Nıderlandy komandasymen kezdesip, úshinshi orynǵa talasady. Álem chempıonatynyń fınalynda Germanııa men Argentına komandalary baq synasady. Bul oıyn Rıo-de-Janeıro qalasyndaǵy «Marakana» stadıonynda ótedi.
