ÁCh-2014: Argentına quramasynyń fanattary Býenos-Aıreste polıtsııany taspen atqylady
ASTANA. QazAqparat - Fýtboldan álem chempıonatynyń fınalynda utylyp qalǵan Argentına quramasynyń fanattary Býenos-Aırestiń ortalyǵynda olardy taratýǵa tyrysqan polıtsııaǵa tas laqtyryp, qarsylyq tanytqan.
Óz kezeginde polıtsııa olardy toqtatý úshin kózdi jasaýratatyn gazdy paıdalanýǵa májbúr boldy.
Al Germanııa quramasynyń jankúıerleri Rıo-de-Janeırodaǵy «Marakana» stadıonynda ózderiniń quramasynyń jeńisin bımen atap ótti. Olarǵa keıinnen dástúrli túrde argentınalyqtardy básekeles kóretin brazılııalyq fanattar qosylǵan kórinedi.
Sheteldik BAQ-tyń jazýynsha, Berlındegi jáne Mıýnhendegi jankúıerler qala kóshelerine shyǵyp, án aıtyp kóńil kótergen eken.
Germanııa Latyn Amerıkasynda Álem chempıonatyn jeńip alǵan birinshi eýropalyq komanda bolyp tabylady.
