ÁCh-2014: Aptap ystyqqa baılanysty úzilis ár matchtaǵy jaǵdaıǵa baılanysty ǵana qarastyrylady
ASTANA. QazAqparat - Halyqaralyq fýtbol qaýymdastyǵy federatsııasy (FIFA) Brazılııadaǵy fýtboldan álem chempıonatynda aptap ystyqqa baılanysty mindetti úzilisterdi engizbeıdi.
Bul týraly uıymnyń resmı saıtynda málim etildi.
Úzilisterdi engizý týraly sheshim álemdik básekede ár matchtaǵy jaǵdaıǵa baılanysty ǵana qabyldanady. Eger aýa temperatýrasy 32 gradýstan joǵary bolsa ǵana FIFA-nyń medıtsınalyq shtabynyń ókilderi FIFA bas úılestirýshisimen jáne match komıssarymen bul máseleni talqylamaq. Al aqyrǵy sheshim kezdesýdiń bas tóreshisimen kelisilip qabyldanady.
Mundaı jaǵdaıda oıynnyń 30-ynshy, sondaı-aq 75-inshi mınýttarynda úzilis jasaý josparlanyp otyr. Ár taımda negizgi ýaqyttan soń úsh mınýttan qosylatyn bolady.
