Abzal Quspan Keden qyzmetin derbes organ retinde qalpyna keltirýdi usyndy

ASTANA. KAZINFORM – Májilis depýtaty Abzal Quspan Premer-mınıstr Oljas Bektenovtiń atyna keden qyzmetindegi problemalar týraly saýal joldady.

— 2014 jyly Úkimet qaýlysymen Memlekettik kiris komıteti qurylyp, salyq jáne keden organdary biriktirildi. Alaıda onyń tıisti nátıje bermeı otyrǵanyn qazirgi ahýal kórsetip otyr. Saldarynan kedendik baqylaýdyń tıimdiligi aıtarlyqtaı tómendep, sybaılas jemqorlyq qaýipteri kúsheıip ketti. Sonymen qatar, keden qyzmeti óziniń quqyq qorǵaý fýnktsııasyn is júzinde joǵaltyp, qarýlar men esirtki kontrabandasyn anyqtaý toqtatyldy. Halyqaralyq quqyq qorǵaý uıymdarymen jumys álsirep, bilikti mamandar júıeden shyǵaryldy. ıAǵnı bul jaǵdaı kedendik túsimderdiń azaıýymen qatar, shekara qaýipsizdigine, ishki turaqtylyqqa aıtarlyqtaı qater tóndirip otyr, — deıdi depýtat. 

Depýtattyń aıtýynsha, 2014 jyldan beri bıýdjetke túsetin kedendik tólemder oǵan deıingi jyldarmen salystyrǵanda 2 ese, kedendik tekserýler nátıjesinde óndirilgen tólemder kólemi 3 ese, ekonomıkalyq kontrabanda faktilerin anyqtaý 2 ese, tárkilengen esirtki zattarynyń kólemi 36 ese azaıyp ketken.

— Buryn júrgizilgen reformalarǵa taldaý júrgizý, olardyń ekonomıka men ulttyq qaýipsizdikke áserin baǵalaý qajet. Keden qyzmetin derbes organ retinde qalpyna keltirip, oǵan kedendik ákimshilendirý, baqylaý jáne kontrabandaǵa qarsy kúres mindetterin júkteý kerek. Keden qyzmetin damytý doktrınasyn ázirlesek, bul kedendik ákimshilendirý úlgisin qalyptastyrady. Reformanyń ashyqtyǵyn qamtamasyz etý úshin ózgeristerdi baqylaý úderisine qoǵam, bıznes jáne sarapshylar qaýymdastyǵyn tartý usynylady, — dedi Abzal Quspan.

Eske salsaq, Senat kedendik bajdardyń úzdiksiz aýdarylýyna arnalǵan zańdy maquldaǵan bolatyn.