Abzal Quspan áleýmettik jelide depýtattarǵa qarsy aıtylǵan úndeýlerge qatysty málimdeme jasady
ASTANA. KAZINFORM – Májilis depýtaty Abzal Quspan janýarlarǵa jaýapkershilikpen qaraý týraly zańǵa engiziletin túzetýler jóninde halyqqa jalǵan aqparat tarap jatqanyn málim etti.
- Sońǵy ýaqytta biz bir qaýipti úrdisti baıqap otyrmyz. Kez kelgen ózekti másele - meıli ol áleýmettik bolsyn, turmystyq bolsyn, tipti janýarlarǵa qatysty bolsyn - áp-sátte emotsııaǵa, aıǵaıǵa, aıyptaýǵa aınalyp ketedi. Osy tusta mańyzdy jaıtty atap ótkim keledi. Qazir qoǵamda keńinen talqyǵa túsken úı janýarlaryna jaýapkershilikpen qaraý týraly zańda ıtterdi 5 kúnge deıin ýaqytsha ustaý qarastyrylǵan. Eger osy merzim ishinde ıesi tabylmasa, ári qaraı tıisti sheshim qabyldaý tetigi kózdelgen. Eń mańyzdysy – osy merzimdi uzartý quqyǵy jergilikti máslıhattarǵa berilip otyr. Óıtkeni, ár óńirdegi jaǵdaı ártúrli. Ókinishke qaraı, zańdaǵy osy normalar qoǵamǵa tolyq jetkizilmeı, aqparat birjaqty tarap jatyr, ıaǵnı fakti emes, manıpýlıatsııa alǵa shyqty. Dıalogtyń ornyna - qysym, pikirtalastyń ornyna - qorlaý keledi. Buǵan naqty mysaldar jetkilikti. AES máselesi, jańa Konstıtýtsııa tóńiregindegi talqylaýlar, qazirgi úı janýarlaryna jaýapkershilikpen qaraý týraly zań jobasy - osynyń bárinde bir stsenarıı qaıtalanyp otyr, - dedi A. Quspan Májilistiń jalpy otyrysy barysynda.
Onyń aıtýynsha, áleýmettik jelilerde, sonyń ishinde Facebook-te jazylǵan pikirlerdiń birqatarynda Jańbyrshın, Ponomarev sekildi depýtattardyń aty atalyp, olarǵa qatysty tikeleı zorlyq-zombylyq jasaýǵa, tipti atyp óltirýge úndeýler aıtylǵan.
- Bul - jaı emotsııa emes. Bul - quqyqtyq baǵa berýdi qajet etetin naqty áreket. Qaqtyǵys tek depýtattar men jekelegen azamattar arasynda ǵana emes, osy zań jobasyn qoldaǵan jáne qarsy bolǵan toptardyń arasynda da qaýipti deńgeıge deıin ýshyǵyp otyr. Mundaı áreketterdiń quqyqtyq shegi bar. Jekkórýshilik týdyrý, arazdyq qozdyrý, zorlyq-zombylyqqa shaqyrý - bular zańmen tikeleı tyıym salynǵan áreketter. Sondyqtan mundaı faktilerge quqyq qorǵaý organdary naqty quqyqtyq baǵa berýge tıis. Bul - jáı pikir emes, qylmystyq jaýapkershilik týyndatatyn áreket. Eń alańdatarlyǵy - osyndaı taqyryptardyń aınalasynda ádeıi qoǵamdy bólýge tyrysatyn, áleýmettik alaýyzdyqty qozdyratyn málimdemelerdiń kóbeıýi. Bul – kezdeısoq qubylys emes. Memlekettik ınstıtýttardy jappaı qaralaý, qoǵamdy bir-birine aıdap salý - bul sóz bostandyǵy emes. Bul - jaýapsyzdyq. Sondyqtan meniń ustanymym aıqyn: biz «Zań men Tártip» qaǵıdatyn sóz júzinde emes, is júzinde qamtamasyz etýge mindettimiz. Qoǵamdyq talqylaý bolýy kerek - biraq ol jaýapkershilikpen júrgizilýi tıis. Syn bolýy kerek - biraq ol dálelge negizdelýi tıis, - dedi depýtat.
Osy oraıda ol kelispeıtin normalarǵa qatysty usynystar zań aıasynda sheshilýi tıis ekenin aıtty.
- Bizde bul úshin barlyq ınstıtýtsıonaldyq tetikter bar. Naqty másele alańdatqan adam - dıalogqa kelsin. Usynys bersin. Baqylaýǵa qatyssyn. Bul - durys ári nátıjeli jol. Biz quqyqtyq memleketpiz. Al quqyqtyq memlekette bir ǵana ólshem bar - ol Zań! Sondyqtan árkim óz sózi men is-áreketine jaýap berýi tıis. Bizdiń mindet - emotsııaǵa ermeý, qoǵamdy bólmeý, kerisinshe biriktirý. Sondyqtan men osy úndeý arqyly barsha azamattardy Zań men Tártip qaǵıdatyn qatań ustanýǵa, ár sóz ben áreketke jaýapkershilikpen qaraýǵa shaqyramyn, - dedi Abzal Quspan.
Eske salsaq, bıyl 8 sáýirde Parlament Májilisi «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» Zań qabyldady.
