Abzal Quspan: 1,2 mln jas jigittiń 3 paıyzy ǵana armııaǵa shaqyrtylyp júr

ASTANA. KAZINFORM – Depýtat Abzal Quspan Májilis otyrysynan keıin Qorǵanys mınıstrliginiń jeke oqý oryndary janynan áskerı kafedralar ashý usynysyn qabyldamaı otyrǵany týraly pikir bildirdi.

Áskerı-patrıottyq tárbıeni kúsheıtýge arnalǵan zań jobasyn talqylaý kezinde mınıstrdiń orynbasary Shaıh-Hasan Jazyqbaev JOO janyndaǵy áskerı kafedralardyń sanyn keńeıtýge qajettilik joq ekenin aıtqan. 

Depýtat Abzal Quspan bul bastamany zańǵa engizý úshin áli de áreket etetinin aıtady. Óıtkeni atalǵan qujat Májilis depýtattarynyń bastamasy boıynsha ázirlenip jatyr.

«Bárimiz geosaıası jaǵdaıdy kórip otyrmyz. Biz qalasaq ta, qalamasaq ta soǵys irgemizge kelip tur. Al endi sandarǵa nazar aýdaryńyz. Armııaǵa jyl saıyn shaqyrylatyn oryn — 40 myń adam. 2024 jyly bizdegi áskerge jaramdy 18 ben 27 jas arasyndaǵy er azamattardyń sany — 1 mln 221 myń adam. Kelesi jyly odan da kóbeıedi. Ár jyl saıyn adam sany tolyǵyp kele jatqanyn bilesizder. Sonda áskerge jaramdy er azamattardyń 3 paıyzyna jetpeıtin bóligi ǵana armııaǵa shaqyrylady eken. 97 protsenti armııanyń tártibinen de habary joq, qarý ustaýdy da bilmeıdi. Árbirden soń psıhologııalyq turǵyda da daıyn emes. Kúnderdiń kúninde eldiń basyna kún týa qalǵan jaǵdaıda olar „oqqa jem bolady“, — deıdi Abzal Quspan.

Depýtat Qorǵanys mınıstrligi qarsy boldy eken dep normany engizýden bas tartpaıtynyn aıtady.

«Jaraıdy, 40 myńnan astam adamdy ásker qatarynda ustasa bıýdjetke salmaq túsedi eken deıik, onda nege jeke oqý oryndaryna áskerı kafedralar ashýǵa kedergi keltirip otyrmyz? Ol jerde árbir oqý orny kafedrany óziniń esebinen ashady. Qorǵanys mınıstrligi metodıkasyn bekittirip, oqýdyń qalaı júrip jatqanyn qadaǵalap otyrsa boldy. Emtıhandy da Qorǵanys mınıstrligindegiler alady», — deıdi depýtat.

«Mınıstrdiń orynbasary qajet emes dedi. Men qajet dep otyrmyn. Zań bastamasy bizdiń qolymyzda ǵoı. Sondyqtan óz basym muny áli kóterem», — dedi ol.