Abzal Ájǵalıev Olımpıadanyń fınalyna shyǵa almaý sebebin aıtty
PHENChHAN. QazAqparat - Búgin Ońtústik Koreıanyń Phenchhan qalasynda ótip jatqan HHIII qysqy Olımpıada oıyndarynda qazaqstandyq short-trekshiler medalsiz qaldy. Onyń sebebin qazaqstandyq short-trekshi Abzal Ájǵalıev Phenchhanda júrgen QazAqparat tilshisine aıtyp berdi.
«Men aldymen 500 metrde shırek fınalda baq synadym. Odan jartylaı fınalǵa ótip, az ýaqyttan keıin taǵy jarys jolyna shyqtym. Jartylaı fınaldy qarqyndy bastap, birinshi orynda kele jattym. Ókinishke qaraı, qarsylastarymyzdyń biriniń konkıi synyp qaldy da, jarysta qaıtadan basynan bastaý kerek boldy. Arada mınýt óter ótpesten qaıta júgirdik, demalyp úlgergen joqpyn. Sol úshin de bolar 500 metrde fınalǵa shyǵa almadym», - dedi Abzal Ájǵalıev.
Sondaı-aq, ol Phenchhan Olımpıadasyna qatysý úshin úsh jyl boıy shetelde jattyǵý jasaǵanyn, endi biraz ýaqyt demalatynyn aıtyp berdi.
«Biz Sochı olımpıadasynan keıin shetelde úsh jyl boıy jattyǵý jasadyq. Ókinishke qaraı, bul Olımpıadada jolymyz bolmady. Endi elge barǵan soń jaqsylap demalyp, kelesi Olımpıada oıyndary týraly oılana bastaımyz», - dedi sportshy.
Eske sala keteıik, Olımpıada oıyndarynda Qazaqstandyq short-trekshiler medalsiz qalǵandyǵy týraly habarlaǵan bolatynbyz.
