Abzal Ájiǵalıev: Olımpıada oıyndarynda atoı salý - ár sportshynyń armany

ASTANA.KAZINFORM — Short-trek sportynan álem kýbogynyń chempıony, Azııa oıyndarynyń altyn medal ıegeri Abzal Ájiǵalıev elordada ótken Qazaqstan chempıonatynda óner kórsetip, jaqsy nátıjege qol jetkizdi. 

Jarystan keıin, sportshy Kazinform tilshisine aldaǵy jospary týraly aıtyp berdi.

— Olımpıada oıyndarynda atoı salyp, medal alý ár sportshynyń armany. Álemdik dodalarda el namysyn abyroımen qorǵaý úshin árqashan bar kúshimdi salamyn. Aldaǵy maýsymda tórt kezeńnen turatyn álem kýbogynda Olımpıadaǵa joldama jeńip alý basty maqsat. Básekelestik óte joǵary, jarys kestesi óte tyǵyz, — dedi ol.

Abzal Ájiǵalıev sporttyq mansabyna baılanysty suraqqa jaýap berdi.

— Men ózimdi elimizde short-trek sportynan tájirıbesi eń mol sportshymyn dep aıta alamyn. Qazaqstanda bul sport túri áli damý ústinde, kásibı sportshylar sany áli jazǵy sporttaǵy sııaqty kóp emes. Alaıda, komandaǵa jas sportshylar kelip, jaqsy óner kórsetip jatsa óte qýanyshty bolamyn. Sporttyq mansabymdy óz ýaqytynda aıaqtaý kerek bolady dep oılaımyn. Sol sebepti, olarǵa ózimniń barlyq tájirıbemmen bólisýge tyrysamyn, — deıdi dańqty sportshy.

Aıta keterligi,Abzal Ájiǵalıev 2016 jyly Solt-Leık-Sıtıde (AQSh) ótken short-trekten álem kýbogynda 500 metr qashyqtyqta chempıon atanyp, elimizge osy sport túrinde álem kýbogynan alǵashqy tarıhı altyn medal syılady.

Eske sala ketsek, Astanada 11-15 qyrkúıek aralyǵynda short-trekten Qazaqstan chempıonaty ótip jatyr.