Abzal Ájiǵalıev: Harbınde basty qarsylasymyz – álem jáne Olımpıada chempıondary

ASTANA. KAZINFORM – Qytaıda ótetin qysqy Azııa oıyndarynda short-trekten báseke shıelenisti bolady. Bul týraly sportshy Abzal Ájiǵalıev Kazinform tilshisine bergen suhbatynda aıtyp berdi.

Qazaqstandyq short-trekshiniń aıtýynsha, quramanyń daıyndyq deńgeıi oıdaǵydaı.

– Erteń qysqy Azııa oıyndaryna qatysý úshin Qytaıdyń Harbın qalasyna attanǵaly otyrmyz. Bıylǵy maýsymdaǵy jattyǵýdy gollandııalyq bapkermen bastadyq. Ol – buǵan deıin Gollandııa jáne AQSh qurama komandalaryn jattyqtyrǵan tájirıbeli bapker. Barlyq tájirıbesin bizben bólisip jatyr. Qazirge deıin tórt álem kýbogy. Al aldymyzdaǵy Azııa oıyndary – eń basty maqsattarymyzdyń biri, - dedi sportshy.

Onyń aıtýynsha, Harbınde álem chempıonaty jáne Olımpıada oıyndarynyń chempıondary basty qarsylas bolmaq.

– Meniń oıymsha, qysqy Azııa oıyndarynda short-trekten básekelestik joǵary bolmaq. Sebebi álem jáne Olımpıada chempıondary negizinen Azııa elderinde jınalǵan. Basty qarsylastarymyz – Koreıa, Qytaı jáne Japonııa elderiniń sportshylary,- dedi Ájiǵalıev.

Sondaı-aq, qazaqstandyq sportshy Harbınde jetistikke jetýge bar kúshin salatynyn aıtty.

– Qarsylastarymyzdyń myqty bolǵanyna qaramastan, quramanyń jetistikke jetýge tájirıbesi óte kóp dep oılaımyn, - dep atap ótti sportshy.

Eske salsaq, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady.

QR Týrızm jáne sport mınıstrliginiń habarlaýynsha, Qazaqstannan 137 sportshy el namysyn qorǵaıdy. 

Aıta keteıik, Elordadaǵy Qazaqstan jeńil atletıka sport kesheninde IX qysqy Azııa oıyndaryna Qazaqstan ulttyq quramasynyń sportshylaryn saltanatty shyǵaryp salý rásimi ótti. 

Osyǵan deıin qysqy Azııa oıyndaryna qatysatyn Qazaqstan quramasynyń tizimi jarııalanǵan bolatyn.