Abzal Ájiǵalıev: barlyq qazaqstandyqty qýantqym kelgen edi

MILAN. KAZINFORM — Italııanyń Mılan qalasynda ótip jatqan XXV qysqy Olımpıada oıyndarynyń erler arasynda short-trekten 500 metrge júgirý jarysy óz máresine jetti.

Short-trekten ulttyq qurama sportshysy Abzal Ájiǵalıev básekeden keıin BAQ ókilderine suhbat berip, jarys nátıjesi týraly pikir bildirdi.

— Barymdy saldym. Básekelestik óte joǵary boldy. Aldymdaǵy nıderlandtyq sportshy óte jyldam júgirdi, ozýǵa múmkindik bermedi. Ekinshi oryndaǵy pozıtsııany qorǵaǵym keldi. Biraq ıtalııalyq sportshynyń jyldamdyǵy tez boldy, ári men kútkendeı oń jaǵymnan emes, sol jaǵymnan ozýǵa tyrysty. Tóreshiler ol sportshyǵa penaltı beredi dep kúttim. Ókinishke qaraı, olaı bolmady, — dedi Abzal.

Sportshy kelesi kezeńge ótken Denıs Nıkıshaǵa sáttilik tilep, barlyq qazaqstandyqtan keshirim surady.

— Iá, osy ýaqytta kóptegen qazaqstandyq uıqtamaı, medaldan úmit kútip otyrdy. Bul meniń tórtinshi Olımpıadam, ár Olımpıadaǵa medal alý úshin kelemin. Ókinishke qaraı, qolymnan kelmedi. Barlyq otandasymnan keshirim suraımyn, — dedi ol.

Abzal Ájiǵalıev Qazaqstanda qysqy sportqa qyzyǵýshylyq artyp kele jatqanyn, sonymen qatar elimizde short-trektiń damýyna óz úlesin qosqanyn aıtty.

— Qazaqstandyqtardyń qoldaýy burynǵydan artyq sezildi. Kóptegen telekórermen jáne áleýmettik jelidegi qoldaýlar keremet boldy. Elimizde qysqy sportqa qyzyǵýshylyq artyp keledi. Ózimdi osy sporttyń damýyna úles qostym dep sanaımyn. Halqaralyq jarystarǵa qatysyp, eńbek ettim. Jas búldirshinderdiń qysqy sportqa kelgenin kórgenimde, eńbegim beker ketpedi dep oılaımyn, — dedi sportshy.

Aıta keteıik, qazaqstandyq sportshy Denıs Nıkısha Italııada ótip jatqan XXV qysqy Olımpıada oıyndarynyń jartylaı fınalyna joldama aldy.

Osyǵan deıin habarlaǵanymyzdaı, Aıana Joldas frıstaıl-akrobatıkadan jekeleı synda jarys jolyn aıaqtady.