Abylaıhan Júsipov ózbek boksshysyna ese jiberdi - ÁCh
ASTANA. QazAqparat - Germanııanyń Gambýrg qalasynda bokstan ótip jatqan álem chempıonatynda 69 keli salmaqta qazaq boksshysy Abylaıhan Júsipov pen ózbekstandyq Shahram Gııasovtyń arasyndaǵy aıqas óz máresine jetti, dep habarlaıdy «QazAqparat» HAA tilshisi.
Aıta keterligi, 69 keli salmaqta ózbekstandyq Shahram Gııasov Rıo olımpıadasynda otandasymyz Danııar Eleýsinovpen fınalda kezdesip, jeńilip qalǵan bolatyn. Bul jolǵy álem chempıonatynda ol Abylaıhanmen qolǵap túıistirdi. Alǵashqy raýnd qos qarsylas úshin terezesi teń dárejede ótken. Aıqastyń ekinshi kezeńinde soqqy almasý jaǵynan Abylaıhan alǵa shyqqany anyq bolatyn. Abylaıhannyń qabaǵynan alǵan jaraqaty bul joly da syr berdi. Biraq otandasymyz aıanyp qalǵan joq.
Aıqas ózbek boksshysynyń basymdyǵymen ótpegendeı kórinse de, tóreshilerdiń sheshimi boıynsha qazaqstandyq sportshy jeńiliske ushyrady. Abylaıhan Júsipov álem birinshiliginiń qola júldegeri.
Eske sala ketsek, keshe, ıaǵnı 31 tamyzda qazaqstandyq 4 boksshy jartylaı fınalda kezdesý ótkizgen bolatyn. Tórt boksshynyń ekeýi - Jomart Erjan jáne Vasılıı Levıt jartylaı fınaldan óte almaı, qola júldeni qanaǵat tutqan. Al boksshylarymyzdyń ekeýi Qaırat Eralıev pen Ábilhan Amanqul fınalǵa joldama aldy.
