«Abylaıdyń aq úıi qalaı qalpyna keltirildi?» - baspasózge sholý
***
Osy ýaqytqa deıin Soltústik Qazaqstan oblysynyń tizginin biraz azamat ustady desek, solardyń ishinde aımaqty 2003-2007 jyldar aralyǵynda basqarǵan Taıyr Aımuhametuly Mansurov sııaqty iske jedel kirisip, birin usaq, birin iri demeı, barlyq máselelerdi birdeı qamtýǵa qulshynys tanytqandary, artyna halyq aıta júrerlikteı jaqsy iz qaldyrǵandary kóp emes. Ol alǵashqy kúnnen ózine Memleket basshysy kórsetken senimdi aqtaýǵa qulshyna kirisip, tórt jyldyń ishinde talaı máseleniń túıinin sheshti. T.Mansurov óńirimizdi basqarǵan jyldary qarjy joq degen jeleýmen jarty alańy saýdagerlerge jalǵa berilip, jabylýdyń az-aq aldynda turǵan oblystyq tarıhı-ólketaný murajaıyn tolyqtaı qalpyna keltirdi, memlekettik tildiń mártebesin ósirý maqsatynda qazaq tili páni muǵalimderiniń eńbekaqysyn birden elý paıyzǵa ósirdi, tuńǵysh ret qazaq tilinde qalalyq gazet shyǵarýǵa uıytqy boldy, jurt áldeqashan «saqaldy qurylystardyń» qataryna jatqyzyp qoıǵan, kózge shyqqan súıeldeı bolǵan Qyzyljar ortalyq meshiti men pravoslavıe shirkeýin bir kúnde iske qosty, uly Abaı men A.Pýshkınge eskertkish qoıdy... T.A.Mansurov Soltústik Qazaqstan oblysyna ákim bolyp kelmese, Abylaıdyń aq úıi de qalpyna kelmes edi, deıdi jergilikti turǵyndar. Ol ras. Taıyr Aımuhametuly talaı jyldardan beri jyry taýsylmaı kele jatqan bul máseleniń de núktesin qoıyp, Qyzyljardyń tórine uly hanǵa eskertkish ornatyp ketti. Óńir úshin uly isterge muryndyq bolǵan osy azamatpen aradaǵy suhbat «Egemen Qazaqstan» gazetinde «Abylaıdyń aq úıi qalaı qalpyna keltirildi?» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Árıne, búgin aıtýǵa ǵana ońaı. Áıtpese, han úıine alǵashqy beınesin berý osy iske qatysqandardan joǵary kásibı sheberlikti, asqan jaýapkershilikti talap etkeni sózsiz. Aldymen qabyrǵalary erekshe berik bolýy úshin temir beldiktermen bekitildi. Іrgetastar qaıta quıyldy. Eki qabatty úıdiń ishi-syrty kirpishpen qaptaldy. Barlyq bólmeler kúrdeli jóndeýden ótkizilip, HVІІІ ǵasyr úlgisinde ulttyq naqyshpen bezendirildi. Birinshi qabatta beıne zaldar, jádigerlerdi qoıatyn arnaıy oryndar ornalassa, ekinshi qabatta hannyń kelýshilerdi qabyldaıtyn jáne jatyn bólmeleri jabdyqtaldy. Hannyń jastyq shaǵyna, ósken ortasyna, memlekettik qyzmetine qatysty dúnıeler de osynda qoıyldy», - deıdi.
Keshe Ortalyq kommýnıkatsııalar qyzmetinde Premer-Mınıstrdiń birinshi orynbasary Baqytjan Saǵyntaev bastaǵan birqatar mınıstrler baspasóz máslıhatyn ótkizdi. Onda elimizdiń áleýmettik-ekonomıkalyq damý úrdisteri saralanyp, osy jyldaǵy ekonomıkalyq damýdyń qorytyndysy shyǵaryldy. Osy brıfıng arqaý bolǵan maqala «Egemen Qazaqstan» gazetinde «Ekonomıkalyq ósim oıdaǵydaı» degen taqyryppen berilgen. Basylymnyń jazýyna qaraǵanda, Óńirlik damý mınıstri B.Jámishev aımaqtardaǵy áleýmettik-ekonomıkalyq máseleler týraly baıandap, túrli memlekettik baǵdarlamalardyń jergilikti jerlerde júzege asyrylý barysymen tanystyrdy. Sondaı-aq, salaǵa qatysty jańadan daıyndalǵan zań jobalary jóninde de áńgimelep, olardyń tıimdi tustaryn taratyp aıtyp berdi. Ol respýblıka aýmaǵyn uıymdastyrýdyń bas shemasyna arnaıy toqtalyp, qala qurylystarynda bul ıgiliktiń qandaı paıdasy bolatyndyǵyn taratyp aıtty. Mundaı bas shema elimizde tuńǵysh ret jasalypty. B.Jámishevtiń aıtýyna ılansaq, óńirlerdi damytý barysynda shemanyń keltirer paıdasy mol bolmaq.
***
«Ulttyq sport túrleri qaýymdastyǵynyń kezekten tys otyrysynda bıylǵy jyldyń qorytyndysy shyǵarylyp, kelesi jyldyń kúntizbelik jospary jasaldy. Basqosý barysynda «Nur Otan» partııasynyń hatshysy, Ulttyq sport túrleri qaýymdastyǵynyń prezıdenti Qaırat Satybaldyuly baıandama jasady. Ol Sport jáne dene shynyqtyrý isteri agenttiginiń deregine súıene otyryp, qazirgi tańda elimizdiń 250952 azamaty ulttyq sportpen aınalysyp jatqanyn jetkizdi», - dep jazady «Aıqyn» gazeti juma kúngi nómirindegi «Sheteldikter bizdi ulttyq sportymyz arqyly tanýy tıis» degen taqyryptaǵy maqalasynda. «EKSPO - 2017» halyqaralyq kórmesine keletin sheteldikter bizdiń ulttyq ereksheligimizge, dástúrimizge, sportymyzǵa aıryqsha nazar aýdaratyndyǵy belgili. Osyny eskere otyryp, biz jalpyulttyq jobaǵa óz úlesimizdi qosýymyz kerek. Sheteldikter bizdi saıasat, ekonomıka arqyly ǵana emes, ulttyq sportymyz arqyly da tanýy tıis», - dedi Q.Satybaldyuly. Onyń pikirinshe, ulttyq sport túrleri qaýymdastyǵynyń qazirgi tujyrymdamasyn zaman talabyna jaýap bere alatyn dárejege jetkizgen jón. Sonymen qatar bıyl qolǵa alynǵanymen tııanaǵyn tappaı qalǵan ulttyq sportty damytýdyń memlekettik baǵdarlamasyn birjaqty qylyp, Úkimetke usyný kerek. Bul baǵdarlama kókpar, aýdaryspaq, teńge ilý, qyz qýý, jamby atý, qazaq kúresi, toǵyzqumalaq jáne basqa da ulttyq sport túrlerin damytýy tıis. Kezegi kelgende sóz sóılegen Ulttyq sport túrleri qaýymdastyǵynyń jańa basshysy B.Tileýhan Qazaqstan tarıhynda emes, álem tarıhynda tuńǵysh ret kókpardan ashyq Azııa chempıonatynyń ótýi ulttyq sportymyzdyń shyn máninde ulyqtalyp jatqanynyń kórsetkishi ekenin aıtty.
Sondaı-aq osy basylymda «Embimunaıgaz» AQ bas dırektory Mahambet Dosmuhambetovpen aradaǵy suhbat «Óndiristiń jáne óńirdiń damýy - ózekti mindetimiz!» degen taqyryppen jarııalandy. Basylym tilshisiniń barlyq saýalyna tuşymdy jaýap bergen ol: «Eger bizdiń kásiporyndy tek munaı ıgerýmen aınalysady dep oılasa, bul birjaqty pikir bolar edi. Biz úshin óndiristik máselelermen birge áleýmettik saıasatty qatar alyp júrý - basym baǵyttarymyzdyń biri. Atyraý oblysy men otandyq munaı óndirýshi kompanııa arasynda ózara túsinistik jáne yntymaqtastyq Memorandýmyna osymen birneshe jyl qatarynan qol qoıylyp keledi. Maqsat - munaıly óńirdiń ınfraqurylymyn damytý, halyqtyń jaǵdaıynyń jaqsarýyna úles qosý, Atyraý óńiriniń ekonomıkalyq-áleýmettik damýyna únemi qoldaý kórsetý. Jyl saıyn jer qoınaýyn paıdalaný kelisimshartynyń negizinde jergilikti bıýdjetke 270 mln teńgeden asa qarjy aýdaramyz. Bul qarajat oblys ákiminiń kelisimimen jergilikti óńirdiń áleýmettik máselelerin sheshýge jumsalady. Bıylǵy jyldyń bólingen qarajatyna toqtalar bolsaq, Isataı aýdany H.Erǵalıev, Tuşyqudyq selolarynyń ishki joldaryn kúrdeli jóndeýge, Maqat aýdanyndaǵy sport (fýtbol) alańdarynyń qurylysyna bólindi. Atyraý qalasynyń Azattyq dańǵylyndaǵy, Abaı, Mahambet, Moldaǵalıev kósheleriniń boıyndaǵy kópqabatty turǵyn úılerdiń qasbetteri kúrdeli jóndeýden ótti. Oblys aýmaǵynda uıymdastyrylatyn ártúrli mádenı-sporttyq sharalarǵa únemi demeýshilik kórsetip kelemiz», - deıdi.
