Abylaı Myrzahmetov Paryz memlekettik nagradasyn taǵaıyndaýdy usyndy

ASTANA. QazAqparat - «Atameken» Ulttyq kásipkerler palatasynyń basqarma tóraǵasy Abylaı Myrzahmetov qaıyrymdylyq jasaýmen halyq súıispenshiligine bólengen kásipkerler úshin «Paryz» memlekettik ordenin taǵaıyndaýdy usyndy, dep habarlaıdy QazAqparat tilshisi.

«Qaıyrymdylyqpen aınalysatyn kásipkerlerge moraldyq qoldaý kórsetýdi mańyzdy dep sanaımyz. Máselen, Reseı prezıdenti jyl saıyn qaıyrymdylyqpen tanylǵan azamattardy memlekettik nagradamen marapattaıdy. Qazaqstanda qaıyrymdylyq jasaǵan kásipkerlerge «Shapaǵat» medali beriledi. Odan bólek, «Paryz» atty memlekettik nagradany bekitýdi usynamyz», - dedi Abylaı Myrzahmetov Astanada ótken baspasóz máslıhatynda.

Sonymen birge, UKP tóraǵasy jyl saıyn uıymdastyrylatyn «Paryz» konkýrsynyń talaptaryn ózgertý qajet dep esepteıdi.

«Jyl saıyn «Altyn sapa» jáne «Paryz» konkýrstary ótkiziledi. Biraq, «Paryz» korporatıvtik áleýmettik jaýapkershilikke baǵyttalǵan. Onda jumys berýshiniń óz qyzmetkerleri aldyndaǵy áleýmettik jaýapkershiligi ǵana baǵalanady. Biz «Paryz» konkýrsyn keńeıtip, tek qana korporatıvtik jaýapkershilik emes, jalpy qaıyrymdylyqpen aınalysatyn azamattardy da marapattaý qajettigin usynamyz. Halyq ıgi isterdiń nazardan tys qalmaıtynyn kórýi kerek», - dep óz sózin túıindedi A.Myrzahmetov.

Aıta ketken jón, «Atameken» Ulttyq kásipkerler palatasy kásipkerlerdi qaıyrymdylyq jasaýǵa shaqyratyn «Atamekenim» qaıyrymdylyq aktsııasyn iske qosty. https://kaz.inform.kz/news/ulttyk-kasipkerler-palatasy-atamekenim-akciyasyn-iske-kosty_a3063685