Abylaı Myrzahmetov fermerlerdi qoldaýǵa qatysty pikir bildirdi
NUR-SULTAN. QazAqparat – «Atameken» ulttyq kásipkerler palatasynyń basqarma tóraǵasy Abylaı Myrzahmetov aýyl sharýashylyǵy salasyndaǵy kásipkerlerdi qoldaýǵa qatysty pikir bildirdi, dep habarlaıdy QazAqparat tilshisi.
«Birinshiden, Úkimet durys sheshim qabyldady. Osy oraıda jem-shóp, mal azyǵyn syrtqa shyǵarýǵa tyıym salyndy. Bul óz kezeginde ishki naryqty qamtamasyz etý úshin mańyzdy. Aldaǵy 1 qyrkúıekten bastap 5-sanatty bıdaıǵa, arpaǵa kvota engizý máselesi qaralyp otyr. Buǵan da oń kózqaras bar. Byltyr osy kvotalardy engizý boıynsha tájirıbe jınadyq», - dedi A. Myrzahmetov Úkimet otyrysynda.
Sonymen qatar ol forvardty satyp alý qadamdaryna toqtaldy.
«Bul kásipkerlerge aınalym aqsha alýǵa óte tıimdi tetik bolyp otyr. Ótken jyly 24 mlrd 500 mln teńge bólinse, bıyl 40 mıllırdqa deıin kóbeıtildi. Ony aýyl sharýashylyǵy taýaryn óndirýshilerdi jaqsy qoldaý dep baǵalaımyz. Aýyl sharýashylyǵy taýaryn óndirýshilerdiń aldynda bir ǵana mindet bar – ol óziniń eginin jınaǵannan keıin, naqty baǵamen taýaryn Azyq-túlik kelisimshart korporatsııasyna ótkizýi kerek», - dedi «Atameken» ulttyq kásipkerler palatasynyń basqarma tóraǵasy.
«Qurǵaqshylyq bolǵan óńirlerdegi kásipkerlerdiń nesıe boıynsha máselesi bar. Ótken jylǵy jaqsy tájirıbe jınadyq, tólemdi keıinge shegerý qadamdary bar. Egin jınaý naýqany aıaqtalǵannan keıin, bul másele qazan aıynda kóterilýi múmkin. Sondyqtan ony qazirden pysyqtaý ótinishi bar», - dedi Abylaı Myrzahmetov.
Budan buryn habarlanǵandaı, Asqar Mamın óńirlerdegi jem-shóp jetkizý jaǵdaıyn erekshe baqylaýda ustaýdy tapsyrdy.
Aıta keteıik, Memleket basshysynyń tapsyrmasy aıasynda bıyl Azyq-túlik kelisimshart korporatsııasy aýyl sharýashylyǵy ónimderin forvardtyq satyp alýdy júzege asyrdy.
