Abylaı Myrzahmetov Atameken UKP basqarma tóraǵalyǵynan bas tartty

NUR-SULTAN. QazAqparat – «Atameken» kásipkerler palatasynyń basqarma tóraǵasy Abylaı Myrzahmetov óz qyzmetinen bas tartty, dep habarlaıdy QazAqparat tilshisi.

«Qurmetti áriptester, osydan 8 jyl buryn Atamekendi ózderińizben birge qurdyq. Maqsat – kásipkerlerdiń basyn qosyp, «bir jeńnen qol, bir jaǵadan bas shyǵarý» edi. Eń bastysy bılik pen bıznestiń arasynda «altyn kópir bolý. Árıne, ulttyq palatanyń qyzmetine qatysty syn aıtylyp jatyr. Ony jasyrmaımyz jáne synnan qashpaımyz», - dedi Abylaı Myrzahmetov «Atameken» ulttyq kásipkerler palatasynyń kezekten tys ІH sezinde.

Onyń aıtýynsha, palatanyń basty mindeti elde kásipkerlikti damytý, kásip ashamyn degen jandarǵa múmkindik berý.

«Óńirlerdi aralap, qoldan kelgenshe ózderińizben birge is-áreket ettik. Búgingi jıynda pikirler ashyq aıtylyp jatyr. Oılaryńyz ben máselelerdi erkin kóterip jatyrsyzdar. Bul palatanyń aıaqtan turǵanyn bildiredi. Qazirgi eldegi jaǵdaı barshańyzǵa málim. Sońǵy 1 aıdyń ishinde ómirimiz aıtarlyqtaı ózgerdi. Jańa Qazaqstanda ómir súrip jatyrmyz. Al kásipkerler jańa Qazaqstandy damytýdaǵy negizgi kúsh. Memleket basshysy da kásipkerlerge úlken úmit artyp otyr. Men búgingi kezekten tys sezdiń aldynda basqarma tóraǵasy retinde quzyretimdi tapsyratynymdy aıtqym kelip otyr», - deıdi ol.

Aıta keteıik, elordada «Atameken» ulttyq kásipkerler palatasynyń kezekten tys ІH sezi ótip jatyr.

Atalǵan jıynda Raıymbek Batalov «Atameken» ulttyq kásipkerler palatasynyń jańa prezıdıým tóraǵasy bolyp saılandy.