Abylaı Myrzahmetov «áleýmettik jeli satýshylarynyń» reestrin qurýdy usyndy

NUR-SULTAN. QazAqparat – Áleýmettik jeli arqyly tapsyrys qabyldap, saýda jasaýshylardyń reestrin qurý qajet. «Atameken» ulttyq kásipkerler palatasynyń basqarma tóraǵasy Abylaı Myrzahmetov Úkimet otyrysynda osyndaı usynys kóterdi, dep habarlaıdy QazAqparat tilshisi.

«Pandemııa elektrondy saýdany damytýdyń draıverine aınaldy. Másele aldaý sharalarynyń áleýmettik jelilerde damyǵandyǵynda – akkaýntty tegin ashý, anonımdilik, qandaı da bir tirkeýdiń bolmaýy, sýbektiniń ornalasqan jerin belgileýdiń múmkin emestigi jáne osyǵan baılanysty ekonomıkanyń osy bir kóleńkeli túrin tómendetýge qatysty áleýmettik jelilerde satýshylardyń tizilimin engizý túrinde quqyqtyq sharalar qabyldaý qajet dep sanaımyz. Tutynýshy satýshynyń eGov-taǵy reestri arqyly, onyń kim ekenin repýtatsııasy qandaı ekenin kóre alady. Bul da tutynýshynyń quqyǵyn qorǵaýǵa kómektesedi den senemiz», - dedi palatanyń basqarma tóraǵasy.

Onyń aıtýynsha, áleýmettik jeli arqyly satylǵan taýardy qaıtaryp berý, olardyń sapasy týraly máseleler zańda naqtylanýy kerek.

«Zań júzinde onlaın platformalar men ınternet-dúkenderdiń tutynýshylaryna qatysty quqyqtardy qorǵaý jan-jaqty rettelgen. Alaıda áleýmettik jelilerde tutynýshylardyń quqyqtaryn retteý men qorǵaýda úlken alshaqtyq bar. Tutynýshylar ınternet arqyly, atap aıtqanda, áleýmettik jelilerde taýarlardy tóleý kezinde aldaýǵa jıi tap bolady.

Elektrondyq saýdada tutynýshylardyń quqyqtaryn pármendi qorǵaý úshin azamattyq qoǵam memlekettik portaldarda, áleýmettik jelilerde satýshylardy erikti tirkeýdi engizýdi usynyp júr. Satýshy óziniń sáıkestendirý nómirin áleýmettik jeli betinde kórsetýi kerek. Ony satyp alýshy belgili bir memlekettik portalda teksere alýy shart», - dedi Abylaı Myrzahmetov.