«Abylaı hannyń armany» qoıylymnyń jastar úshin tárbıelik máni zor - G.Ábdiqalyqova (FOTO)
ASTANA. QazAqparat - Búgin QR Memlekettik hatshysy Gúlshara Ábdiqalyqova Q.Qýanyshbaev atyndaǵy memlekettik akademııalyq qazaq mýzykalyq drama teatrynda bolyp, «Abylaı hannyń armany» atty tarıhı dramanyń tusaýkeserine qatysty.
Qoıylym bastalar aldynda BAQ ókilderine suhbat bergen Memlekettik hatshy óz sózinde aǵymdaǵy jyly Qazaqstan halqy Assambleıasynyń, Konstıtýtsııamyzdyń 20 jyldyǵy, Jeńistiń 70 jyldyǵy, sonymen qatar Qazaq handyǵynyń 550 jyldyǵy atalyp ótiletindigin eske salyp ótti.
«Qazaq handyǵynyń 550 jyldyǵy boıynsha jyl boıy mádenı jáne ǵylymı baǵyttaǵy ártúrli is-sharalar bolady. Ol is-sharalar elordamyz Astanada, jergilikti jerlerde, aımaqtarda da uıymdastyrylady. Sondaı sharalardyń biri - búgingi Q.Qýanyshbaev atyndaǵy memlekettik akademııalyq qazaq mýzykalyq drama teatryndaǵy «Abylaı hannyń armany» atty qoıylym. Bul qoıylymnyń jastar úshin tárbıelik mańyzy óte zor. Abylaı han bizdiń tarıhymyzdaǵy uly tulǵa. Elbasymyz aıtqandaı, Abylaı han tek naızanyń ushymen ǵana emes, dıplomat retinde de kóregendigimen eldi qorǵap, Qazaq tarıhynda uly tulǵaǵa aınalǵan adam», - dedi ol.
Aıta keterligi, qoıylymdy Memlekettik hatshymen birge Mádenıet jáne sport mınıstri A.Muhamedıuly, Senat jáne Májilis depýtattary, elordanyń zııaly qaýym ókilderi tamashalady.
«Abylaı hannyń armany» qoıylymy kórermenderge jańa nusqada usynylyp otyr. Onda ótken men búgingi kúnniń arasyndaǵy úzdiksiz rýhanı baılanys bar. Qoıylymnyń avtory - belgili jazýshy, dramatýrg Dýman Ramazan. Qoıýshy-rejısseri - Qazaqstannyń eńbek sińirgen qaıratkeri Bolat Uzaqov.
