Abylaı hannyń 300 jyldyǵy memlekettik deńgeıde atap ótilýi tıis - T. Qadambaev
ASTANA. Qyrkúıektiń 29-y. QazAqparat /Qanat Mámetqazyuly/ -Keler jyly týǵanyna 300 jyl tolatyn Abylaı hannyń mereıtoıy táýelsizdiktiń 20 jyldyǵy sheńberinde memlekettik deńgeıde atap ótilýi tıis. Búgin QR Parlamenti Májilisiniń jalpy otyrysynda Úkimet basshysynyń atyna joldaǵan saýalynda depýtat Toqtarbaı Qadambaev osy máseleni kóterdi.
«Alash balasyna Abylaı hannyń kim ekenin aıtyp jatýdyń ózi artyq. Uly Abaı ony: «Qazaq halqynyń qaharmany» dese, Maǵjan aqyn : «Alashtyń arystany - Abylaı er», dep jyrǵa qosqan. Osydan birneshe jyl buryn Býrabaıda Abylaı hanǵa arnap eskertkish ornatý barysynda Elbasy N. Nazarbaev onyń ult tarıhyndaǵy orny týraly: «Ár halyqtyń tarıhynda esimi máńgi óshpesteı, el jadynda saqtalǵan tarıhı tulǵalar bolady. Qazaq halqynyń tarıhyndaǵy sondaı kıeli tulǵalarynyń bireýi ǵana emes biregeıi - Abylaı han. Abylaı esimi qazaq tarıhynda eń kóp atalyp, ardaqtalǵan tulǵa», degen sózderi halyq jadynda. Abylaı shyn máninde kózi tirisinde aty ańyzǵa aınalyp, qazaq eliniń táýelsizdigi úshin 40 jyl boıy attan túspeı kúresken uly tulǵa. Onyń qaıtalanbas asyl beınesi el basyna kún týǵan, jońǵar shapqynshylyǵy órshigen, qazaq halqynyń taǵdyry qyl ústinde, qylysh júzinde turǵan qıyn-qystaý kezeńde jarqyraı kórindi», dedi depaýtat.
Sonymen birge, T. Qadambaev «Abylaıdyń qazaq bostandyǵy men bolashaǵyna jol salǵan» qaıratkerligine toqtala kele, el tarıhyndaǵy onyń ishki jáne syrtqy saıasatty derbes júrgize bilgen dara basshylyǵyn erekshe atap ótti. Sonymen qatar, depýtat aldaǵy jyly Abylaı hannyń týǵanyna 300 jyl tolatynyn aıtyp, ondaı uly tulǵanyń mereıtoıyna táýelsizdiktiń 20 jyldyǵy tuspa-tus keletinin jetkizdi.
«Bundaı mereıtoı táýelsizdik sheńberinde memlekettik deńgeıde atap ótilse nur ústine nur bolar edi. Eldiń tutastyǵyn, ulan-ǵaıyr jerimizdi saqtap qalý úshin jany men aryn aıamaǵan Abylaıdaı asyl erdiń sińirgen eńbegi men erligi bolashaq urpaq úshin máńgilik maqtanyshqa aınalýy tıis», dedi depýtat.
