Abylaı han, úsh bı, Tomırıs: Pavlodar oblysynda teatrlandyrylǵan qoıylym usynyldy
Merekege jınalǵan kórermenderdi keremet qoıylym kútip turdy. Qazaq Ordasynyń tarıhyndaǵy eń uly handardyń biri, úsh júzdiń basyn biriktirgen - Abylaı han, qazaqtyń qoǵam qaıratkeri, ataǵy jer jarǵan sheshen, Uly júzdiń basty bıi, «Jeti jarǵyny» jasaýshylardyń biri Tóle bı, qoǵam jáne memleket qaıratkeri, qazaq halqynyń uly bıi qaz daýysty Qazybek, kemeńger, danyshpan, aıyr tildi alshyn Áıteke bı atqa minip, júrip ótti. Sondaı-aq aınalasyna shýaq shashqan, bar qazaqtyń anasy Domalaq ana men kishkentaı bala at arbanyń ústinde otyrsa, kúı atasy Qurmanǵazy men el birligin nyǵaıtqan ǵulama oıshyl, kúıshi, jyraý, asqan sáýegeı, baqsy, kúıshilik, jyrshylyq óneriniń atasy Qorqyt ata jandarynda jaıaý shyqty.
Massaget halqynyń baıyrǵy zamanda el bılegen ataqty hanshaıymy Tomırıs pen qazaq halqynyń qaharmany Alpamys batyr, turmys-salt ertegilerindegi basty keıipker Tazsha bala jaıaý, qazaq aýyz ádebıetiniń keıipkeri, aqyldy aılakeri Aldar Kóse de kópshilikke kórindi.
Ulttyq sport oıyndary boıynsha respýblıkalyq jarystarda Pavlodar oblysynyń namysyn qorǵap júrgen kókparshy azamattar Táýelsizdik alańynyń ortasymen shaýyp ótti.
Aıtýly merekemen aýdan turǵyndaryn oblys ákimi Ábilqaıyr Sqaqov quttyqtap, árbir otbasyna baq-bereke, molshylyq pen amandyq tiledi.
- Naýryz merekesi - birlik pen tazalyqtyń, tatýlyqtyń sımvolyna aınalǵanyna belgili, - dedi Ábilqaıyr Sqaqov. - Eki jyldan astam pandemııaǵa baılanysty halqymyz Naýryz meıramyn toılaı almaı júrdi. Barlyǵymyz osy kóktemgi merekeni saǵynyp qaldyq. Sol sebepti barlyǵyńyzben birge osy bir meıramdy qarsy alǵanyma shyn júrekten qýanyshtymyn. Qazirge zaman qubylmaly. Álemde nebir jaǵdaılar oryn alýda, soǵan qaramastan elimizde, memleketimizde qanshama 100-den astam ult ókilderi tatý-tátti ómir súrýde. Munyń barlyǵy - yntymaq pen birliktiń jemisi. Maı aýdanynyń jetistikteri elimizdiń, Pavlodar oblysynyń áleýmettik-ekonomıkalyq ósýine eleýli úles qosýda».
Oblys ákimi sońǵy jyldary aýyl sharýashylyǵy damyp kele jatqanyn, mal sharýashylyǵy jáne ósimdik sharýashylyǵy, onyń ishinde shaǵyn jáne orta bıznestiń memlekettik qoldaýdyń arqasynda birqatar mańyzdy jobalar iske asyryp jatqanyn erekshe atap ótti.
- Árıne, bul ártúrli salada istep jatqan ózimizdiń jerlesterimiz, Maı aýdanynyń turǵyndary kúndelikti óz eńbekterimen memlekettiń damýyna óz úlesterin qosýda. Memleket basshysy Qasym-Jomart Toqaev 16 naýryzda óz Joldaýynda saıası reformalardy bastap berdi. Osy saıası reformalardyń arqasynda úlken-úlken ózgeristerdi kútýdemiz, - dedi aımaq basshysy.
Maı aýdany Saty aýylynyń kitaphanashysy Láıla Bóstekbaeva qol dıirmenimen kópshilikke bıdaı tartyp kórsetti. Ol bul 50 jyldyq tarıhy bar dıirmenniń atasynan qalǵanyn aıtady.
- Ertede ata-babalarymyz dıirmenmen bıdaıdy tartyp, talaı qıyndyqtan shyqqan. Bul quraldyń adamzat úshin mańyzy zor. Sondyqtan jastarǵa ótken tarıhtan syr shertetin qural – dıirmenmen bıdaı tartý protsesin kórsetýdi jón kórdim. Bul ózimniń úıdegi qoldanyp júrgen atamyzdan qalǵan dıirmen, - deıdi aýyl turǵyny.
Shara merekelik kontsertpen jalǵasyn tapty. Qydyr ata bata berdi. «Baýyrsaq patı» barysynda qonaqtarǵa baýyrsaq taratyldy. Maı aýdany daryndy da talantty balalarynan qurylǵan Baıǵabyl Jylqybaev atyndaǵy balalar óner mektebiniń «Qazaq-ult» aspaptary órskestri Qurmanǵazynyń «Saranjap» kúıin oryndady.
