Abylaı han rezıdentsııasyn jóndeýge 34 mln-ǵa jýyq teńge bólindi

PETROPAVL. QazAqparat – Petropavldaǵy «Abylaı han rezıdentsııasy» murajaı kesheniniń jóndeý jumystaryn nurotandyqtardan quralǵan monıtorıngtik top baqylaýǵa aldy, dep habarlaıdy QazAqparat tilshisi.

«Nur Otan» partııasy SQO fılıaly baspasóz qyzmetiniń málimetinshe, mádenıet jáne sport nysandaryn jóndeý jáne qurylysyn baqylaý boıynsha arnaıy top Abylaıhan han rezıdentsııasyndaǵy jumystardy kórgen.

Murajaı kesheninde jóndeý jumystary birer apta buryn bastaldy. Qurylysshylar 1 tamyzǵa deıin ony aıaqtaýy kerek. Osy maqsatqa 33 mln 740 myń teńge bıýdjet qarajaty bólingen.

Reıd barysynda top músheleri atqarylyp jatqan jumystyń sapasyna mán berdi. Máselen ǵımaratta sý burý júıesi qarastyrylmaǵan. ıAǵnı, jańbyr jaýǵan saıyn aqqan sý jańadan tóselgen kespe tastardy búldirýi múmkin. Sondaı-aq, quıma tastardy tóseý sapasy da olardyń kóńilinen shyqpady.

«Shatyrdan aqqan sýdy burýǵa mán berý kerek. Áıtpese eńbek esh bolady. Tóselgen quıma tastar sýmen ornynan qozǵalyp, úgitilýi múmkin, ári aqqan sý esik aldyna jınalyp, kelýshilerge yńǵaısyzdyq týdyrady. Muny biz qurylys salasyndaǵy maman bolmasaq ta kórip turmyz. Іrgetas, brýschatka jańbyrdan soń buzylady. Sodan keıin qaıta salý kerek pe?», - dedi baqylaý tobynyń múshesi Alan Jýkov.

Nysanda jóndeý jumystaryn júrgizip jatqan merdiger kompanııanyń basshysy qoǵam ókilderimen kezdesýge kelgen joq. Sol sebepti top músheleriniń suraqtaryna seriktestiktiń qurylysshy-sheberine jaýap berýge týra keldi. Onyń aıtýynsha, jobada sý burý josparlanbaǵan eken, biraq monıtorıngtik top músheleriniń aralasýynan keıin, bul másele qaıta qaralady. Nurotandyqtar birer aptadan keıin nysandaǵy jóndeý jumystaryn qaıta kelip kórmekshi.

«Búgin biz jaǵdaımen tanystyq. Keıin taǵy kelip ne jasalǵanyn, eskertýlerdi qalaı eskergenin kóremiz. Baqylaý kerek, sonda ǵana merdiger kompanııalardyń jaýapkershiligi artady», - deıdi top múshesi, SQO Mádenıet, muraǵattar jáne qujattama basqarmasy basshysynyń orynbasary Dosbol Ábdirisov.

«Qutty meken» ulttyq jobasy aıasynda qurylǵan monıtorıngtik toptyń quramyna oblystyq jáne qalalyq máslıhattardyń depýtattary, jýrnalıster, blogerler, memlekettik organdar men qoǵamdyq birlestikterdiń ókilderi kirgen.