ABUǴO-da týa bitken patologııalary bar nárestelerge neonataldyq operatsııalar jasaý úshin tıimdi jaǵdaılar jasalǵan

Ulttyq medıtsınalyq holdıngtiń baspasóz qyzmetinen málim etkendeı, ABUǴO-da týa bitken patologııalary bar shaqalaqtarǵa operatsııalar jasaıtyn mamandar shet elderdiń ozyq emhanalarynda bilim alyp kelgen. Ota jasaý bólimsheleri aldyńǵy qatardy endobeınehırýrgııalyq apparattarmen jabdyqtalǵan. Medıtsınanyń bul salasynyń álemdik damýynan qalys qalmas úshin Reseı, Avstralııa jáne Germanııa elderiniń tanymal hırýrgtary sheberlik-sabaqtaryn ótkizip turady.

Týa bitken syrqattardan kóz jumatyn sábılerdiń ólim-jitimin azaıtý maqsatynda QR densaýlyq saqtaý mınıstrligi Ana men bala ulttyq ǵylymı ortalyǵynyń bazasynda neonataldy hırýrgııa jónindegi úılestirý ortalyǵyn qurdy. Ortalyqty qurýdaǵy maqsat Qazaqstan aýmaǵynda jańa týǵan nárestelerge halyqaralyq standarttarǵa sáıkes medıtsınalyq kómek kórsetý bolyp tabylady.

Ortalyqtyń hırýrgtary klınıkalyq tájirıbege ınvazıvtigi az kelesideı ádisterdi engizdi: damýda kinárattary bar nemese keýde qýysy aǵzalarynyń (dıafragmalyq jaryqtar, iriń kernegen isikter, keýde qýysynyń isikteri), qursaq qýysy aǵzalarynyń (baýyrdyń iriń kernegen isikteri, ót aıdaý júıeleri, holetsıstıt, splenektomııa, nefroektomııa, gernıorafııa, varıkotsel, krıptorhızm) syrqattarynda qoldanylatyn laparoskopııalyq aralasý. Osy ádisterdi qoldanýdyń arqasynda atalmysh patologııalary bar balalardyń emin áldeqaıda jaqsartýǵa, otadan keıingi asqynýlardy azaıtýǵa, naýqastardy aýrýhanada ustaý merzimin azaıtýǵa múmkin boldy. Ortalyqta alǵash ret Gırpshprýng syrqatyna laparoskopııalyq túzeý júrgizildi, Gırpshprýng syrqatyn transanaldyq túzeý ótkiziledi.

Aıta keteıik, balalar densaýlyǵyn qorǵaýdy damytýdyń basymdy baǵyttarynyń biri jańa týǵan nárestelerdiń hırýrgııasy - neonataldy hırýrgııany damytý bolyp tabylady. Dúnıe esigin ashyp úlgermegen sábılerdiń ólimi men jastaıynan múgedekke shaldyǵý oqıǵalarynyń 40-50 paıyzy tuqymqýalaýshylyq faktorlarǵa tikeleı baılanysty. Al statsıonarlardaǵy oryndardyń 30 paıyzyn týa bitken kemistikteri bar balalar alyp otyr. Qazaqstan Respýblıkasynyń 2010 jylǵy statıstıkasyna súeıensek, bir jasqa tolmaǵan balalardyń dúnıeden ozý sebepteriniń ishinde týa bitken patologııalar 24,7 paıyzdy qurady.