Ábý-Nasyr ál-Farabıdiń qoljazbasy Túrkııadan tabyldy
Qoljazbalar jáne sırek kitaptar ulttyq ortalyǵynyń mamandary Túrkııadan tabylǵan uly oıshyl, ǵulama, ǵalym Ábý Nasyr ál-Farabı qoljazbasynyń kóshirmesin jaryqqa shyǵardy, dep habarlaıdy Kazinform.
Qoljazba arab tilinde jazylǵan. XIII ǵasyrda jazylǵan bul týyndy kúni búginge deıin tolyq zerttelmegen.
«Ál-Farabıdiń «Mýzyka salasyna kirispe» dep atalatyn eńbegi hıjra boıynsha 655 jyly 12 djamalı aýval, grıgorıan kúntizbesi boıynsha 1257 jyldyń 3 maýsymy, dúısenbige sáıkes keledi. Qoljazba 243 betten turady. Qoljazba túpnusqamen salystyryla otyryp kóshirildi. Eńbekte mýzykalyq ǵylymnyń suraqtary tereń zerttelgen, mýzykalyq kompozıtsııa tehnıkasy, shyǵys jáne ortaazııalyq aspaptar egjeı-tegjeıli sıpattalǵan. Kóshirme úsh apta kóleminde basyp shyǵaryldy»,-deıdi restavrator maman Janserik Beısenqulov.
«Mýzyka salasyna kirispe» qoljazbasy úsh bólimnen turady.Eńbekte mýzykalyq ónerdiń prıntsıpteri, negizgi termınder jáne mýzyka páni qamtylǵan. Mamandardyń aıtýynsha, kitapta mýzykalyq aspaptar men ár túrli áýenderdiń shyǵarmalaryna, kategorııasyna jáne basqa da aspektilerine keńinen toqtalǵan.
Ǵulama oıshyl Ábý Nasyr ál-Farabıdiń eńbegi Túrkııaǵa jasalǵan saparda Súleımanııa kitaphanasynan tabyldy. Qoljazbalar jáne sırek kitaptar ulttyq ortalyǵynyń mamandary 2022 jyly 9 elge 11 ǵylymı-izdestirý issaparyn jasady.
«Arhıv-2025» jobasy aıasynda QR Mádenıet jáne aqparat mınıstrligi birqatar jobalardy júzege asyrdy. Otandyq jáne sheteldik arhıvter men mýzeılerden kitaphanalar men ǵylymı ortalyqtardan Qazaqstan tarıhy boıynsha qujattar men materıaldardy izdeý-anyqtaý, kóshirmesin alý boıynsha ǵylymı-zertteý jumystary uıymdastyrylyp, olardy ǵylymı aınalymǵa engizý josparlanǵan.
"QR Ulttyq arhıvi men Ortalyq memlekettik arhıvi, Ortalyq memlekettik kıno jáne fotoqujattar men dybystyq jazbalar arhıvi, Qoljazbalar jáne sırek kitaptar ulttyq ortalyǵy Germanııa, Reseı, Túrkııa, Vengrııa, Tatarstan, Qyrǵyzstan, Chehııa, Frantsııa, Iran Islam Respýblıkasy jáne Egıpet syndy taǵy da basqa elderge baryp, tarıhı qujattar kóshirmesin elge jetkizdi. Qazirgi ýaqytta tarıhymyzdyń aqtańdaq betterin túgendep, tyń derektermen tolyqtyrý maqsatynda elge ákelingen qoljazbalar men arhıvtik qujattar mamandardyń qatysýymen zerttelýde",-dedi Arhıv, qujattama jáne kitap isi komıtetiniń tóraǵasy Qýat Borash.
