Abý-Dabıdiń Taq murageri Qazaqstanmen qaı salalardaǵy yntymaqtastyq jandanatynyn aıtty
ASTANA. KAZINFORM – Aqordada Memleket basshysy Qasym-Jomart Toqaevpen keńeıtilgen quramdaǵy kelissóz barysynda Abý-Dabıdiń Taq murageri sheıh Haled ben Muhammed ben Zaıd Ál-Nahaıan Qazaqstanmen qaı salalardaǵy yntymaqtastyq jandanatynyn aıtty.
- Prezıdent myrza, men úshin búgin Astanada bolý úlken mártebe. Árıne, men BAÁ prezıdenti Muhammed ben Zaıd Ál Nahaıannyń rızashylyǵyn bildirgim keledi. Qazaqstan bizdiń aýmaǵymyzda eleýli úlesi bar el ekenin atap ótkim keledi. Sizdi Otan qorǵaýshy kúnimen jáne Jeńis kúnimen quttyqtaımyn. Bul oqıǵalar, árıne, Qazaqstan halqynyń boıynda sol bir kúshti bildiredi jáne biz de ardagerlerińizge alǵys bildirgimiz keledi. BAÁ men Qazaqstan ózara yntymaqtastyq pen qurmetke, sondaı-aq odan ári ilgerileýge beıildilik tanytady, - dedi mártebeli meıman.
Abý-Dabıdiń Taq murageriniń aıtýynsha, sońǵy jyldary eki el arasyndaǵy yntymaqtastyq artyp, túrli qorlar men ınvestıtsııalardy keńeıte túsýde. Yntymaqtastyq energetıka, kólik, logıstıka, tsıfrlyq ınfraqurylym, sondaı-aq basqa da salalarda jol qoıylǵan. Aldaǵy ýaqytta BAÁ ınvestıtsııa esebinen Jambyl oblysynda jel energııasy stansasy salynady.
- Bizdiń seriktestigimiz tsıfrlyq transformatsııada jasandy ıntellekt, sýperkompıýterler sondaı-aq aqyldy qalalar boıynsha qyzmetterdi damytýda jańa yntymaqtastyqpen ilgerileıtin bolady. Jańa tehnologııany qarjylandyrýda biz strategııalyq salalarda, onyń ishinde jańa naryqtardy kapıtaldandyrýda, sondaı-aq jańa aspektilerdi jobalaýda jumysty jalǵastyratynymyzdy atap ótkimiz keledi, - dedi Haled ben Muhammed ben Zaıd Ál-Nahaıan.
Qasym-Jomart Toqaev búgin Aqordada Abý-Dabıdiń Taq muragerin qarsy aldy.