Abý-Dabıde Ýkraına boıynsha úshjaqty kezdesýler bastaldy
ASTANA. KAZINFORM – Birikken Arab Ámirlikteri Reseı, Ýkraına jáne AQSh ókilderiniń qatysýymen Ýkraına máselesine qatysty kelissózder bastalǵanyn málimdep, saıası retteý úderisiniń ilgerileýine úmit bildirdi, dep habarlaıdy agenttik menshikti tilshisi.
Kelissózder 23 qańtarda Abý-Dabıde bastalyp, eki kúnge josparlanǵan. Bul týraly BAÁ Syrtqy ister mınıstrligi habarlady. Kezdesýlerge úsh eldiń de joǵary deńgeıdegi delegatsııalary qatysyp jatyr. Bul jóninde WAM agenttigi málim etti.
BAÁ Syrtqy ister mınıstri ári vıtse-premeri sheıh Abdalla ben Zaıd Ál Nahaıan kezdesýlerdiń ótýin quptap, mundaı basqosýlardy uıymdastyrý halyqaralyq qaýymdastyqtyń Birikken Arab Ámirlikteriniń jaýapty ári senimdi deldal retindegi róline degen senimin bildiretinin atap ótti.
– Qaqtyǵystardyń turaqty sheshimi tek dıalog pen shıelenisti báseńdetý arqyly ǵana júzege asady, – dep málimdedi syrtqy saıasat vedomstvosynyń basshysy.
Ol BAÁ-niń dıplomatııalyq kúsh-jigerdi qoldaýǵa jáne uzaqqa sozylǵan daǵdarys jaǵdaıynda dıalog kópirlerin qurýǵa beıildiligin rastady.
Sondaı-aq sheıh Abdalla kelissózderdiń qaqtyǵysty toqtatýǵa baǵyttalǵan naqty qadamdarǵa alyp keletinine úmit bildirdi. Aıtýynsha, tórt jylǵa jýyq ýaqytqa sozylǵan qaqtyǵys aıtarlyqtaı gýmanıtarlyq saldarmen qatar júrip keledi.
Sheıh Abdalla AQSh prezıdenti Donald Tramptyń kelissóz úderisin bastaýǵa járdemdesý jáne saıası baǵytty ilgeriletý jolyndaǵy kúsh-jigerin joǵary baǵalady. Sonymen qatar BAÁ-niń úsh taraptyń bárimen ornyqty áriptestik qarym-qatynasy elge asa qajet kezeńde jaýapty dıplomatııany júzege asyratyn senimdi ról atqarýǵa múmkindik beretinin atap ótti.
Kelissózder AQSh pen Ýkraına kóshbasshylary arasyndaǵy sońǵy baılanystar, sondaı-aq AQSh-tyń arnaıy ókiliniń Reseı prezıdenti Vladımır Pýtınmen ótkizgen jekelegen konsýltatsııalary aıasynda ótip jatyr. Buǵan deıin Ýkraına prezıdenti Vladımır Zelenskıı Davosta Donald Tramppen kezdesý ótkizgen.
BAÁ Syrtqy ister mınıstrligi eldiń buǵan deıin Reseı men Ýkraına arasynda ustalǵan adamdardy almastyrý boıynsha 17 raýnd kelissózge deldal bolǵanyn eske saldy. Sol almasýlar nátıjesinde 4 641 adam bostandyqqa shyqqan. Ámirlik tarapynyń baǵalaýynsha, bul BAÁ-niń eki elmen de qarym-qatynasynyń tereńdigin jáne dıplomatııalyq ári gýmanıtarlyq sheshimderdi ilgeriletýdegi rólin dáleldeıdi.
Buǵan deıin Zelenskıı AQSh, Ýkraına jáne Reseı arasynda BAÁ-de kelissózder ótetinin málimdegeni habarlanǵan bolatyn.