Ábý-Dabıde Ýkraına boıynsha ótken keńestiń birinshi kúninde taraptar málimdeme jasamady

ASTANA. KAZINFORM – Abý-Dabıde ótken Ýkraına, Reseı jáne AQSh arasyndaǵy úshjaqty konsýltatsııalardyń jańa raýndynyń alǵashqy kúninde taraptardyń eshqaısysy málimdeme jasamady. Kelissózder jalǵasady dep josparlanyp otyr, dep habarlaıdy Kazinform agenttiginiń menshikti tilshisi.

Reuters agenttiginiń málimetinshe, kelissózderge AQSh deldaldyq jasap otyr jáne olar eki kúnge eseptelgen. Agenttik deregine súıensek, bul kezdesý buryn bastalǵan dıalogtyń zańdy jalǵasy ári Máskeý men Kıev ókilderiniń tikeleı baılanysyn da qamtyǵan.

Ýkraına delegatsııasynyń jetekshisi Rýstem Ýmerov konsýltatsııalardyń alǵashqy kúnin mazmundy ári nátıjeli dep baǵalady.

Onyń aıtýynsha, taraptar jalpylama urannan góri naqty qadamdar men praktıkalyq sheshimderge basymdyq bergen.

-Jumys naqty ári ónimdi boldy, talqylaý naqty qadamdar men praktıkalyq sheshimderge baǵyttaldy, — dep jazdy Ýmerov X áleýmettik jelisinde.

Sondaı-aq ol kún qorytyndysy boıynsha Ýkraına prezıdenti Vladımır Zelenskııge arnaıy baıandama daıyndaıtynyn málimdedi. Al kelissóz barysynan habardar derekkóz Reuters agenttigine taraptardyń kezdesýdi beısenbi kúni jalǵastyrýdy josparlap otyrǵanyn aıtqan.

Kreml buǵan deıin kelissózder júrip jatqan kezde aralyq pikir bildirýdi kózdemeıtinin habarlaǵan.

Reseı prezıdentiniń baspasóz hatshysy Dmıtrıı Peskov alǵashqy kúnniń qorytyndysy boıynsha resmı aqparat kútýdiń qajeti joq ekenin atap ótken.

Aıta ketý kerek, Ábý-Dabıdegi bul kelissózder ekinshi ret ótip otyr. Úshjaqty konsýltatsııalardyń alǵashqy raýndy 23–24 qańtar kúnderi uıymdastyrylǵan edi jáne ol Reseı, Ýkraına men AQSh arasyndaǵy osyndaı formattaǵy alǵashqy ashyq ári tikeleı baılanys retinde tarıhta qaldy.

Osyǵan deıin Ábý-Dabıde Ýkraına boıynsha konsýltatsııalardyń ekinshi kezeńi bastalǵanyn jazdyq.