Abý-Dabıde Ýkraına boıynsha konsýltatsııalardyń ekinshi kezeńi bastaldy
ASTANA. KAZINFORM — Birikken Arab Ámirlikteriniń astanasynda Ýkraına, AQSh jáne Reseıdiń qatysýymen Reseı-Ýkraına qaqtyǵysyn retteý boıynsha kelissózdiń kelesi kezeńi bastaldy, dep habarlaıdy Kazinform menshikti tilshisi.
Ýkraına delegatsııasynyń basshysy Rústem Ýmerov konsýltatsııalardyń bastalǵanyn habarlady.
Onyń aıtýynsha, kelissóz protsesi úshjaqty formatta bastaldy, sodan keıin taraptar naqty salalar boıynsha bólek toptarda jumys isteýge kóshedi.
— Kelissóz protsesi úshjaqty formatta bastaldy — Ýkraına, Qurama Shtattar jáne Reseı. Sodan keıin naqty trekter boıynsha bólek toptarda ustanymdardy birlesip úılestirý josparlanǵan, — dep atap ótti Rústem Ýmerov.
Ol Ýkraına delegatsııasy Ýkraına prezıdenti Vladımır Zelenskıı belgilegen aıqyn nusqaýlarǵa sáıkes áreket etip jatqanyn jáne turaqty jáne ádil beıbitshilikke qol jetkizýdi kózdep otyrǵanyn atap ótti.
— Biz Memleket basshysyn kelissózdiń árbir kezeńiniń barysy týraly habardar etip otyrmyz, — dep qosyp ótti Ýkraına delegatsııasynyń basshysy.
Qańtar aıynda Abý-Dabıde Ýkraına boıynsha eki kúndik konsýltatsııalar aıaqtaldy.
Taraptar arasyndaǵy negizgi kelispeýshilikter aýmaqtyq máseleler jáne yqtımal kelisim sharttary bolyp qalyp otyr. Máskeý kelisimge qol jetkizýdiń bir sharty retinde Ýkraına kúshteriniń Donetsk oblysynyń shyǵys aýdandarynan shyǵarylýyn talap etti. Kıev áskerdiń birjaqty shyǵarylýyna jol berilmeıtinin málimdep, qaqtyǵys syzyǵyn qazirgi pozıtsııasynda bekitilýin jaqtaıdy.
Ýkraına prezıdenti Vladımır Zelenskıı buǵan deıin aýmaqtyq másele kelissóz kún tártibiniń ortalyq elementi bolyp qala beretinin, eki taraptyń da qaqtyǵysty toqtatýǵa degen mindettemelerin ózara oryndaý qajettiligin atap ótken. Ýkraına prezıdenti AQSh jáne Reseımen úshjaqty kezdesýlerdiń jańa kezeńi aldynda kelissóz tobymen kezdesý ótkizip, Ýkraınanyń naqty qadamǵa daıyn ekenin málimdedi.
Prezıdent Tramp ákimshiligi sońǵy bir jyl ishinde Máskeý men Kıevtiń ustanymdaryn úılestirýge baǵyttalǵan dıplomatııalyq kúsh-jiger jumsady. Amerıka ókilderiniń qatysýymen konsýltatsııalardyń birneshe raýndyna qaramastan taraptar negizgi máseleler boıynsha áli de aıtarlyqtaı kelispeýshilikterdi saqtap keledi.
Aıta keteıik, Ýkraına, Reseı jáne AQSh arasyndaǵy eki kúndik kelissózder qańtar aıynyń sońynda Abý-Dabıde aıaqtaldy. Taraptar 1 aqpanda kezdesýge kelisti.
Alaıda, belgili bolǵandaı, kelissózderdiń kelesi kezeńi 4 jáne 5 aqpanǵa aýystyryldy.