Abý-Dabıde Ýkraına boıynsha kelissózder senbi kúni jalǵasady

ASTANA. KAZINFORM —  Abý-Dabıde AQSh, Ýkraına jáne Reseı arasyndaǵy úshjaqty konsýltatsııalar juma kúni sessııany resmı málimdemesiz aıaqtady, al kelissózder kelesi kúni jalǵasady dep josparlanyp otyr, dep habarlaıdy Kazinform agenttiginiń menshikti tilshisi.

Kyiv Post basylymynyń málimetinshe, ýkraınalyq delegatsııa basshysynyń ókili Rýstem Ýmerov juma kúnigi talqylaýlar aıaqtalǵanyn rastady. Kıev ýaqyty boıynsha saǵat 21:30-ǵa (Astana ýaqyty boıynsha 00:30) resmı kommıýnıke jarııalanbaǵanymen, keıbir habarlarda konsýltatsııalar senbi kúni qaıta bastalatyny aıtylǵan.

Aq úı ókili NBC News telearnasyna Abý-Dabıde ótken úshjaqty kezdesýdiń ónimdi bolǵanyn jáne kelissózderdiń jalǵasatynyn habarlady. CNN telearnasy da óz deregine súıene otyryp, talqylaýlardyń osylaı ótkeni týraly aqparat berdi.

Reseı BAQ-tary habarlaǵandaı, kelissózder barysynda býferlik aımaqtar qurý máselesi jáne ártúrli baqylaý mehanızmderi qarastyrylǵan.

TACC agenttiginiń dereginshe, bul aspektiler basqa taqyryptarmen qatar talqylanǵan, biraq kelissózderdiń mazmunyna resmı rastaý joq.

Ýkraına prezıdenti Vladımır Zelenskıı keshki úndeýinde Kıevtegi ókilderdiń oǵan kelissóz barysy týraly saǵat saıyn esep berip otyrǵanyn aıtty. Onyń sózinshe, talqylaýlar qaqtyǵysty toqtatý parametrlerine shoǵyrlanǵan, al ýkraınalyq delegatsııaǵa naqty kelissózdik pozıtsııa sheńberleri berilgen.

— Olar soǵysty toqtatý parametrleri týraly sóılesip jatyr. Endi olarǵa Reseıden kem degende keıbir jaýaptar bolýy kerek, eń bastysy — Reseı ózi bastaǵan soǵysty toqtatýǵa daıyn ba, — dep jazdy Vladımır Zelenskıı.

Ol ýkraınalyq pozıtsııa ózgermegenin atap ótti, alaıda kelissózderdiń nátıjeleri týraly qorytyndy jasaý áli erte ekenin aıtty, óıtkeni kelissózder senbide jalǵasady.

Emırat agenttigi WAM habarlaǵandaı, BAÁ prezıdenti Muhammed ben Zaıed ál-Nahaııan AQSh, Reseı jáne Ýkraına delegatsııalary basshylarymen kezdesý ótkizdi jáne olarǵa sáttilik tiledi.

Buǵan deıin biz BAÁ astanasynda Reseı men Ýkraına arasyndaǵy kelissózder bastalǵanyn habarlaǵan bolatynbyz.