Abý-Dabıde Ýkraına boıynsha eki kúndik konsýltatsııalar aıaqtaldy
ASTANA. KAZINFORM — Abý-Dabıde Reseı, Ýkraına jáne AQSh arasyndaǵy úshjaqty konsýltatsııalardyń ekinshi kúni taraptardyń resmı málimdemelerinsiz aıaqtaldy, dep habarlaıdy Kazinform agenttiginiń menshikti tilshisi.
Reuters agenttigine silteme jasaǵan derekkózderdiń habarlaýynsha, kelissózder senbi kúni qaıta jalǵasyp, túrli formatta ótken. Reseıdiń TASS agenttigi kezdesýler birneshe saǵatqa sozylǵanyn naqtylaǵanymen, talqylaýlardyń mazmuny ashyq jarııalanbady.
RIA Novostı men Ýkraınanyń qoǵamdyq Suspilne taratýshysyn qosa alǵanda, reseılik jáne ýkraınalyq BAQ málimetinshe, kelissózderdiń ekinshi raýndy shamamen úsh saǵatqa sozylǵan. Onyń qorytyndysy boıynsha taraptardyń eshqaısysy resmı kommıýnıke jasaǵan joq.
Ýkraına delegatsııasynyń basshysy Rýstem Ýmerovtyń baspasóz hatshysy Dıana Davıtıan senbi kúni konsýltatsııalardyń ekinshi raýndynyń aıaqtalǵanyn rastady. Buǵan deıin reseılik resmı aqparat agenttikteri Reseı delegatsııasynyń qonaqúıge oralǵanyn, al amerıkalyq taraptyń Abý-Dabıden ketkenin habarlaǵan bolatyn.
Rýstem Ýmerov buǵan deıin talqylaýlar qaqtyǵysty aıaqtaý parametrlerine jáne kelissóz úderisiniń aldaǵy logıkasyna baǵyttalǵanyn aıtqan. Ýkraına prezıdenti Vladımır Zelenskıı konsýltatsııalardyń barysyna pikir bildire otyryp, aýmaqtyq másele negizgi taqyryp bolyp qala beretinin atap ótti jáne qaqtyǵysty aıaqtaýǵa taraptardyń ózara daıyn bolýy qajet ekenin aıtty.
Óz kezeginde, Birikken Arab Ámirlikteriniń bıligi Reseı men Ýkraına delegatsııalarynyń tikeleı kezdesýi tynysh ári ózara túsinistikke negizdelgen jaǵdaıda ótkenin habarlady. Al Reuters agenttiginiń málimetinshe, kelissózder barysynda AQSh buǵan deıin usynǵan beıbit jospardyń jekelegen tustary talqylanǵan.
Máskeýde de dıalogty jalǵastyrýǵa daıyn ekeni málimdeldi. TASS agenttigine silteme jasaǵan derekkóz Abý-Dabıdegi konsýltatsııalar belgili bir nátıjeler bergenin aıtqanymen, olardyń mazmunyn naqtylamady.
Amerıkalyq-ızraıldik jýrnalıst Barak Ravıdtiń málimetinshe, ýkraınalyq ókilder Abý-Dabıde ótken úshjaqty konsýltatsııalardy pozıtıvti jáne konstrýktıvti dep baǵalaǵan.
🚨🇺🇸🇺🇦🇷🇺Trilateral talks between U.S., Russia and Ukraine in Abu Dhabi were "positive" and "constructive", Ukrainian officials tell me. Another round of talks to be held in Abu Dhabi next week
— Barak Ravid (@BarakRavid) January 24, 2026
Onyń aıtýynsha, osy formattaǵy kelesi kezdesý kelesi aptada taǵy da Abý-Dabıde ótýi múmkin.
Buǵan deıin Abý-Dabıde Ýkraına boıynsha kelissózder senbi kúni jalǵasatynyn jazǵanbyz.