Ábý-Dabıde «Qunanbaı» fılmi kórsetiledi
ALMATY. QazAqparat – Búgin, 27 qańtarda Ábý-Dabıdegi «Manarat ál Saadııat» mádenı ortalyǵynda Qazaqstan kınosy kúnderiniń ashylý saltanatynda rejısser Doshan Joljaqsynovtyń «Qunanbaı» fılmi kórsetiledi, dep habarlaıdy QazAqparat tilishisi «Qazaqfılmge» silteme jasap.
Kınostýdııanyń málimetinshe, mádenı is-shara Qazaqstan Respýblıkasynyń Prezıdenti Qasym-Jomart Toqaevtyń Birikken Arab Ámirlikterine resmı sapary aıasynda uıymdastyrylǵan.
«Qunanbaı» kınosynan bólek, «Qazaq bıi» derekti fılmi kórsetiledi. Bul týyndynyń rejısserleri – Ánýar Sadyqova jáne Ǵazız Nasyrov. Derekti fılmde jas balerına, A.Seleznev atyndaǵy Almaty horeografııa ýchılışesiniń stýdenti, halyqaralyq baıqaýlardyń laýreaty Janel Ulanovanyń óneri arqyly qazaq bıiniń tarıhy baıandalady.
Al erteń, 28 qańtarda rejısser Rústem Ábdirashevtiń «Qazaq handyǵy» tarıhı kınodıologııasynyń eki birdeı maýsymy – «Almas qylysh» jáne «Altyn taq» fılmderi usynylady. Bul týyndylardyń stsenarıi Іlııas Esenberlınniń «Kóshpendiler» trılogııasynyń «Almas qylysh» atty birinshi romanynyń negizinde jazylǵan. «Qazaq handyǵy» aýqymdy tarıhı jobanyń ıdeıa avtory – QR Tuńǵysh Prezıdenti – Elbasy N.Á.Nazarbaev.
Qazaqstan kınosy kúnderiniń sońǵy kúni, 29 qańtarda rejısser Aqan Sataevtyń «Elbasy joly. Astana» jáne rejısser Djeff Vespanyń «Ámire» fılmderi kórsetiledi.
Týyndylardyń barlyǵy qazaq tilinde (aǵylshyn tilindegi tıtrleri bar) usynylatyn bolady.
