Ábý-Dabıde Qazaqstan dıplomattarynyń turǵyn kesheni salyndy
ASTANA. 20 jeltoqsan. QazAqparat - Birikken Arab Ámirlikteriniń astanasy - Ábý-Dabı qalasynda Qazaqstan Respýblıkasy Elshiliginiń dıplomattary kóppáterli jańa turǵyn keshenge kóshti.
Bul joba Qazaqstan Respýblıkasynyń Prezıdenti N.Á.Nazarbaev pen Birikken Arab Ámirlikteriniń Prezıdenti sheıh Halıfa ben Zaıd Ál Nahaıan arasynda qol jetken ýaǵdalastyqtyń negizinde júzege asyryldy.
BAÁ SІM jaýapty tulǵalary, dıplomatııalyq korpýstyń ókilderi qatysqan saltanatty ashylý rásiminde sóz sóılegen QR Syrtqy ister mınıstrliginiń Jaýapty hatshysy Asqar Mýsınov bul keshenniń Qazaqstan men Ámirlikter arasynda qalyptasqan ózara senimdi jáne erekshe jyly yqylasty dostyq qatynastardyń aıqyn úlgisi ekenin atap ótti.
Elshilik qyzmetkerlerine arnalǵan keshen Ábý-Dabıdiń jańadan damyp kele jatqan sheıh Muhammed ben Zaıd Ál Nahaıan atyndaǵy qalashyǵynda ornalasqan. Keshende dıplomattar úshin barlyq jaǵdaılar jasalǵan: páterler tolyǵymen jıhazdarmen, zamanaýı tele jáne beıneqondyrǵylarmen, baılanys júılerimen jabdyqtalǵan; balalarǵa arnalǵan oıyn alańy, meıramhana, kitaphana, sondaı-aq deneshynyqtyrý zaly bar.
