Abý-Dabıde Iran jibergen zymyrannan bir adam qaza tapty
ASTANA.KAZINFORM — BAÁ bıligi egemendigine qol suǵylyp, tynyshtyǵynyń buzylǵanyn málimdedi. Endigi kezekte jaýap berý quqyǵy ózderinde ekenin eskertti, dep Kazinform agenttiginiń Taıaý Shyǵystaǵy menshikti tilshisi jazdy.
Abý-Dabıde ırandyq ballıstıkalyq raketalardy atyp túsirý barysynda bir adam qaza tapty. Bul týraly BAÁ Qorǵanys mınıstrligine silteme jasap, WAM memlekettik aqparat agenttigi habarlady.
Resmı málimdemege sáıkes, zenıttik-raketalyq qorǵanys quraldary Iran aýmaǵynan atylǵan birneshe raketalardy joıǵan. Nátıjesinde jerge qulaǵan zymyrannyń bólshekteri el astanasynyń aýlasynda júrgen azııalyq ulttan shyqqan bir adamǵa zııanyn tıgizip,kóz jumydy buǵan qosa múliktiń de de búlingeni belgili boldy.
BAÁ Qorǵanys mınıstrligi shabýyldy qatty aıyptap, azamattyq nysandar men ulttyq mekemelerge jasalǵan soqqylardyń qaýipti eskalatsııa men beıbit halyqtyń qaýipsizdigine tóngen qaýip ekenin atap ótti.
Málimdemede Irannyń áreketi «ulttyq egemendik pen halyqaralyq quqyqty ashyq buzý» retinde qarastyrylatyny aıtylǵan. BAÁ bıligi ózderiniń osy eskalatsııaǵa jaýap qaıtarý jáne óz aýmaǵyn qorǵaý úshin qajet sharalardy qabyldaýǵa tolyq quqyly ekenin atap ótti, olar kez-kelgen qaýipterge qarsy turýǵa daıyn ekenin málimdedi.
Osy ýaqytta Abý-Dabı men Dýbaı qalalarynda taǵy da jarylys bolǵany habardyń kelgeni aıtylǵan. Buǵan deıin astananyń ústindegi áýe keńistigi atystarǵa baılanysty jabyldy. Jarylystar týraly jańa oqıǵalar týraly resmı aqparattar joq. Sondaı-aq, Dýbaıdaǵy Býrdj Halıfa tanymal záýlim ǵımaratynan adamdar evakýatsııalanǵany habarlandy.
Aıta keteıik, Izraıl búgin Tegeranǵa «preventıvtik soqqy» jasady. Bul týraly Izraıldiń Qorǵanys mınıstri Israel Kats málimdedi.
Osy jaǵdaıǵa baılanysty áýe keńistigi jabylǵannan keıin ushaqtar Irandy aınalyp ótýge májbúr boldy.
Taıaý Shyǵystaǵy jaǵdaıǵa baılanysty Almaty men Astanadan ushyp shyqqan ushaqtar keri oralatyny belgili boldy.
Iran Izraılge qarymta jaýap retinde birneshe zymyran jiberdi.
Artynsha Izraıl premer-mınıstri Bınıamın Netanıahý Iranǵa qarsy Izraıl men AQSh-tyń birlesken operatsııasy ekenin málimdedi.
Al Qazaqstannyń SІM Irandaǵy Qazaqstan azamattarynyń arasynda zardap shekkender joq ekenin málimdedi.