Ábý-Dabıde azııalyq bokstyń damý máseleleri talqylandy
ASTANA. QazAqparat - Ábý-Dabıde Azııalyq boks konfederatsııasynyń atqarý komıtetiniń (ASBC) otyrysy ótti, dep habarlaıdy ASBC baspasóz qyzmeti. Otyrysta qarjylyq esep pen aldaǵy jyldyń bıýdjeti, sonymen qatar qurlyqtyq bokstyń damý jospary talqylandy.
«Atalmysh is-shara aıasynda ASBC atqarý komıteti músheleri mártebeli Sheıh Naıan Bın Mýbarak Al Naıanmen, mádenıet, jastar jáne áleýmettik damý isteri boıynsha mınıstrimen kezdesti», - dep aıtylady habarlamada.
- Biz ulttyq federatsııamyzǵa qajetti memlekettik qoldaý kórsetýge daıynbyz. Jaqyn bolashaqta bokstan chempıonat ótedi dep úmittenemiz, - dep atap ótti Sheıh Al Naıan.
ASBC atqarý komıteti otyrysta 2017 jylda ótetin jarystardyń kúntizbesin bekitti.
Halyqaralyq áýesqoı boks qaýymdastyǵynyń (AIBA) vıtse-prezıdenti, ASBC prezıdenti Serik Qonaqbaev: «Eresekter arasyndaǵy bokstan Azııa chempıonaty Indonezııada mamyr aıynda, jastar arasyndaǵy bokstan Azııa chempıonaty Taılandta maýsym aıynda, 19-22 jastaǵy jastar arasyndaǵy bokstan Azııa chempıonaty Fılıppınde tamyz aıynda, áıelder arasyndaǵy bokstan Azııa chempıonaty Vetnamda qazan aıynda ótedi», - dep málimdedi.
Búgin Shveıtsarııada aldaǵy boks olımpıadasyn damytý máseleleri qaralatyn AIBA kezekten tys kongresi óz jumysyn bastady.
