Ábý-Dabıde AQSh azamatshasyn aıaýsyz óltirgen kúdikti ustaldy
ÁBÝ-DABI. QazAqparat - Birikken Arab Ámirliginde Ábý-Dabı polıtsııasy qoǵamnyń qyzý talqysyna aınalǵan 48 jastaǵy AQSh azamatshasynyń ólimine qatysty kúdiktini tutqyndady.
Eske sala keteıik, Ábý-Dabıde balabaqshada qyzmet etip júrgen AQSh azamatshasyn «Reem Aıland» aýdanyndaǵy «Býtık moll» sýpermarketiniń áıelder dárethanasynda baýyzdap ketken bolatyn.
Kúdikti dárethanadan shyǵyp kele jatqanda baqylaý vıdeokameralaryna túsip qalǵanymen «nıqab» (musylman áıelderiniń kózi ǵana kórinetindeı etip betin búrkep alatyn kıim túri) kıip alǵandyqtan onyń kim ekenin ajyratý tergeýshilerge qıynǵa soqqan. Degenmen, BAÁ quqyq qorǵaý organdaryna atalǵan qylmysty ashýǵa 48 saǵat jetkilikti boldy. Sársenbi kúni Ábý-Dabı polıtsııasy 48 jastaǵy BAÁ azamatshasyn óz úıinde tutqyndady. BAÁ polıtsııasynyń habarlaýynsha, kúdikti birneshe AQSh azamatshasyn óltirýdi josparlaǵan. Ol taǵy bir AQSh azamatyn (dáriger) óltirý úshin jarylǵysh zat qoıyp ketpek bolǵanynda ustalyp otyr. BAÁ Premer-mınıstriniń orynbasary, Іshki ister mınıstri sheıh Saıf bın Zaıed atalǵan oqıǵa boıynsha ótkizgen press-konferentsııada kúdiktiniń úıinen jarylǵysh zat bólshekteri tabylǵanyn aıtty. Sheıh Saıf óltirilgen jáne óltirmek bolǵan adamdardyń kúdiktimen eshqandaı jeke qarym-qatynasy bolmaǵanyn atap ótti. Boljam boıynsha bul terrorlyq motıvterdi basshylyqqa alǵan, BAÁ ulttyq qaýipsizdigin buzý úshin jiberilgen adam bolýy múmkin. Osyǵan oraı ІІM basshysy eldegi tynyshtyqty buzýǵa árekettengen adamdardyń bılik qatań ári, aıaýsyz jolyn kesetinin eskertti.
