Abý-Dabıde 6 jasar qazaqstandyq djıtser chempıon atandy
ALMATY. KAZINFORM — Birikken Arab Ámirlikterinde djıý-djıtsýdan ótken halyqaralyq týrnırden qazaqstandyq sportshylar júldeli oraldy.
«Sagadat Batyr — QTT» sport klýbynyń málimetinshe, Abý-Dabı qalasynda ótken dúbirli dodaǵa álemniń 75 memleketinen 2 myńnan astam sportshy qatysty. Jarys qorytyndysy boıynsha otandastarymyz 1 altyn, 1 kúmis jáne 2 qola júlde ıelendi.
6-7 jas sanatynyń 22 keli salmaǵynda baq synaǵan Aılın Iskakova altyn aldy. Ol boz kilemde 2 kezdesý ótkizip, Ulybrıtanııa men Reseıden kelgen qarsylastaryn merziminen buryn aýyrtý ádisimen taza jeńgen. Aılınniń jeke bapkeri, qońyr belbeý ıegeri Narıman Daýylbaev ta eresekter arasyndaǵy básekede úzdik úshtikten kórindi. Ol qońyr belbeýler arasyndaǵy 69 keli salmaq dárejesinde baq synap, qola júldeger atandy.
Sondaı-aq ardagerler arasyndaǵy 77 keli salmaqta Murat Dosjanov kúmis júlde, 16-17 jas sanatynda (60 keli) Erqanat Erqul qola júlde jeńdi.
Eske salaıyq, Aleksandr Ývarov aýyr atletıkadan Azııa chempıonatynyń qola júldegeri atandy.
