Ábý-Dabı Plazadaǵy sheteldik qurylysshylardyń jalaqysy qazaqstandyqtardan tómen
ASTANA. QazAqparat - «Astana» radıosynyń tikeleı efırinde suhbat bergen qalalyq Jumyspen qamtý, eńbek jáne áleýmettik qorǵaý basqarmasynyń basshysy Ermek Ospanov Ábý-Dabı Plaza keshenindegi sheteldik qurylysshylardyń jalaqysy týraly pikir bildirdi, dep habarlaıdy QazAqparat «Elorda Info» portalyna silteme jasap.
Efır barysynda radıotyńdarmandardyń biri: «Ábý-Dabı Plazadaǵy sheteldik qurylysshylar qazaqstandyqtarǵa qaraǵanda shynymen de kóp jalaqy alady ma?» degen saýal joldady.
«Ábý-Dabı Plazadaǵy janjaldan keıin komıssııa jumys istedi. Turmystyq jaǵdaılaryn, syıaqylardy, ústeme aqylardy tekserdik. Biz sheteldik jumysshylarmen de, qazaqstandyqtarmen de sóılestik. Shtattaǵy qyzmetkerlerdiń jalaqysyn tekserdik. Sheteldik jumysshylardyń jalaqysy, bizdiń azamattarǵa qaraǵanda tómen dep aıta alamyn. Ábý-Dabı Plazadaǵy sheteldik jumysshylardyń kelisimshartta kórsetilgen ortasha jalaqysy 300 AQSh dollaryn quraıtyn bolsa, dál sondaı qyzmettegi bizdiń azamattardyń jalaqysy 120 myń teńgeden bastalady. Atqarylǵan jumys kólemine qaraı tólenetin jalaqy odan joǵary», - dep jaýap berdi Ermek Ospanov.
Basqarma basshysy, sondaı-aq keshen qurylysyna Qazaqstan azamattary ǵana jumys isteıtin 120 qosalqy merdiger kompanııa jumyldyrylǵanyn tilge tıek etti.
Eske salaıyq, aǵymdaǵy jyldyń 2 qyrkúıegi kúni Astanada salynyp jatqan «Ábý-Dabı Plaza» nysany aýmaǵynda qazaqstandyq jáne sheteldik jumysshylar arasynda daý-janjal týyndady. Polıtsııa bólimshesine jetkizilgen 41 adamnyń 8-i ákimshilik jaýapkershilikke tartyldy. Qalǵandary túsindirý jumystary júrgizilip, qoǵamdyq tártipti buzýǵa jol bermeý týraly eskertýden keıin bosatyldy. Astana qalalyq ІІD qurylys aýmaǵyndaǵy tártipsizdikke qatysty qylmystyq is qozǵady.
Keıin málim bolǵandaı, 60 úndi jumysshysy eline qaıtaryldy.
