«Ábý-Dabı Plaza» keshenindegi órt faktisi boıynsha qylmystyq is qozǵaldy
ASTANA. QazAqparat - Astanada salynyp jatqan «Ábý-Dabı Plaza» kópsalaly keshenindegi órt faktisi boıynsha qylmystyq is qozǵaldy. Nysandaǵy órt qaýipsizdigine jaýap beretin «NıkaStroıServıs» JShS ınjener qyzmetkerleri tergelip jatyr.
Bul týraly QR ІІM Tótenshe jaǵdaılar komıtetiniń resmı ókili Rýslan Imanqulov habarlady.
«Qozǵalǵan qylmystyq is barysynda 28.06.2010 jylǵy № 295-IV QR Zańyna sáıkes nysanda órt qaýipsizdigin qamtamasyz etetin «NıkaStroıServıs» JShS ınjener qyzmetkerleri, sonymen qatar qurylys kompanııasynyń qyzmetkerleri tergelip jatyr», - delingen R. Imanqulovtyń habarlamasynda.
Eske sala keteıik, «Ábý-Dabı Plaza» keshenindegi órt saǵat 10:44-te joıyldy.
2016 jyly 13 aqpanda búgin saǵat 4:40-ta kezekshi bólimge «Abu Dabi Plaza» keshenindegi órt týraly habar túsken. Habarlama túskennen keıin 10 mınýt ishinde órt sóndirý qyzmeti oqıǵa ornyna jetti.
Saǵat 8.25-te tilsiz jaý aýyzdyqtaldy.
Podezd joldary bolmaǵandyqtan jalynmen arpalysý qıyn soqty. Aldyn ala málimet boıynsha, órt gaz ballondardyń jarylýynan shyqqan. Jalynnyń shyǵý sebepteri anyqtalyp jatyr.
Salynyp jatqan «Ábý-Dabı Plaza» keshenindegi órttiń taraýyn jáne ǵımarattaǵy jaǵdaıdy joǵarydan baıqap, oǵan baǵa berý úshin Evrokopter 145 QR SІM TJK «Qazavıaqutqarý» AQ tikushaǵy jumyldyryldy.
Japa shekkender joq.
Órt sóndirýshiler 150 jumysshyny qaýipsiz jerge shyǵardy.
Jalynmen kúreske bıik ǵımarattardaǵy órtti sóndirýge arnalǵan bıiktigi 88 metr «BRONTO SKYLIFT» tehnıkasy tartyldy.
Tilsiz jaýdy aýyzdyqtaýǵa 78 órt sóndirýshi men 27 órt sóndirý tehnıkasy jáne Astana qalalyq ІІD 12 tehnıkasy men 24 adamy jumyldyryldy.
Órt sóndirýshiler kelgenshe 11 qabattan 25 qabatqa deıin órtenip jatty.
Oqıǵa ornyna ІІM basshysy general-polkovnıgi Q.Qasymov jáne mınıstrdiń orynbasary V. Bojko keldi.
