Ábý Dabı qalasynda Qazaqstan Elshiligine jer telimi beriledi
«Qazaqstan Respýblıkasy men Birikken Arab Ámirlikteri 1992 jylǵy 1 qazanda dıplomatııalyq qatynastar ornatylǵan sátten bastap yntymaqtastyqtyń barlyq salalaryn nyǵaıtýda eleýli tabystarǵa qol jetkizdi. 2017 jylǵy 15 qańtarda Ábý Dabı qalasynda jasalǵan atalǵan kelisimdi ratıfıkatsııalaý ekijaqty yntymaqtastyqty odan ári jandandyrý jáne dıplomatııalyq qatynastardy damytý úshin mańyzdy.
Zań jobasynyń qabyldanýy Qazaqstan Respýblıkasynyń Birikken Arab Ámirlikterindegi jáne Birikken Arab Ámirlikteriniń Qazaqstan Respýblıkasyndaǵy dıplomatııalyq ókildikteriniń jumys isteýine qolaıly jaǵdaı jasaıdy», - dedi Syrtqy ister mınıstri Muhtar Tileýberdi
Onyń aıtýynsha, kelisimniń 1-babyna sáıkes ámirlikter tarapyna Nur-Sultan qalasynda Táýelsizdik jáne R.Qoshqarbaev dańǵyldarynyń qıylysynda kólemi 26 147 sharshy metr jer ýchaskesi, al qazaqstandyq tarapqa Ábý Dabı qalasynda dıplomatııalyq korpýs ornalasqan aýdanda kólemi 11 148 sharshy metr jer ýchaskesi 49 jyldyq merzimge óteýsiz paıdalanýǵa, keıinnen osyndaı merzimge uzartý shartymen beriledi.
«Budan basqa, QR Tuńǵysh Prezıdenti – Elbasy N.Nazarbaevtyń BAÁ basshylyǵymen jeke dostyq qarym-qatynasynyń arqasynda 2010 jylǵy 19 qazanda Ábý Dabı ámirliginiń murager hanzadasy sheıh Muhammed ben Zaıd Ál Nahaıan Qazaqstannyń BAÁ-degi Elshiliginiń qajettilikteri úshin óteýsiz jáne merzimsiz paıdalaný úshin qosymsha 1 gektar jer ýchaskesin bólý týraly buıryq shyǵarǵan. Jobany qabyldaý teris áleýmettik-ekonomıkalyq saldarǵa ákep soqtyrmaıdy jáne respýblıkalyq bıýdjetten qosymsha qarjy qarajatyn bólýdi talap etpeıdi», - dedi mınıstr.
