Ábý-Dabı densaýlyq saqtaý departamentiniń basshysy men orynbasary COVID-19-ǵa qarsy vaktsına synaqtaryna erikti túrde qatyspaq
ÁBÝ-DABI. QazAqparat – Ábý-Dabıdiń densaýlyq saqtaý departamentiniń tóraǵasy sheıh Abdalla bın Mýhammed Al Hamed pen onyń orynbasary mindetin atqarýshy dáriger Djamal Alkaabı COVID19-ǵa qarsy ekpeni klınıkalyq synaqtan ótkizetin eriktiler qataryna qosyldy. Bul týraly QazAqparat WAM-ǵa silteme jasap habarlady.
Synaq ámirliktiń túrli memlekettik medıtsınalyq mekemelerinde ótedi.
Qazirgi ýaqytta Qytaıdyń China National Biotec Group (CNBG) kompanııasy jasap shyǵarǵan COVID-19-ǵa qarsy ekpeniń III synaq merzimi júrip jatyr. Ony Densaýlyq saqtaý mınıstrliginiń basshylyǵymen Ábý-Dabıdiń mamandandyrylǵan medıtsınalyq komandasy synaqtan ótkizýde.
Al Hamed pen Alkaabı ekpeniń dozasyn qabyldaý úshin Sheıh Halıf atyndaǵy medıtsınalyq qalashyqqa keldi.
«Búginde BAÁ tek óz halqy úshin ǵana emes, barlyq adamzat úshin ekpe izdeýge óz úlesin qosýda. Biz azamattarymyzdyń densaýlyǵyn qamtamasyz etý úshin barlyq múmkindikterdi paıdalanyp, barynsha kúsh salýymyz qajet», - dep málimdedi Al Hamed.
Ol BAÁ barlyq azamattary men turǵyndaryn koronavırýs ınfektsııasyna qarsy ekpeni klınıkalyq synaqtan ótkizýge qatysýǵa shaqyrdy.
Eske salaıyq, BAÁ densaýlyq saqtaý organdary 15000 eriktiniń klınıkalyq synaqtan ótkizýge qatysýyna ruqsat etti.
Vaktsınany synaqtan ótkizýdiń I jáne II kezeńi sátti aıaqtalyp, eriktilerdiń júz paıyzynan antıdene anyqtaldy.
Foto: doh.gov.ae
